भोंदू डॉक्टरांच्या तपासणीची यंत्रणाच उभारणे आवश्यक!
‘क्यूआर कोड’च्या निर्णयाला विरोध

सकाळ वृत्तसेवा
मुंबई, ता. २९ : भोंदू डॉक्टरांवर कारवाई करण्यासाठी महाराष्ट्र वैद्यकीय परिषद (एमएमसी) राज्यातील सर्व दवाखान्यांमध्ये क्यूआर कोड लावणे बंधनकारक करण्याच्या तयारीत आहे. मात्र हा निर्णय घेण्याआधीच डॉक्टरांनी त्याला जोरदार विरोध केला आहे. केवळ क्यूआर कोड लावून भोंदू डॉक्टरांना थांबवता येणार नाही, तर यासाठी ठोस तपासणी यंत्रणा तयार करणे आवश्यक आहे, अशी भूमिका डॉक्टर संघटनांनी मांडली आहे. त्यासाठी वैद्यक व्यावसायिकांशी चर्चा आवश्यक असल्याचेही त्यांनी स्पष्ट केले.
एमएमसीने ‘नो युवर डॉक्टर’ मोहिमेद्वारे सर्व एमबीबीएस डॉक्टरांसाठी क्यूआर कोड लागू केला होता. रुग्णांनी खरे डॉक्टर ओळखावेत यासाठी ही मोहीम हाती घेतली होती. मात्र डॉक्टरांचा पुरेसा पाठिंबा नसतानाही आता ही व्यवस्था बंधनकारक करण्याचे पाऊल एमएमसीने उचलले आहे.
असोसिएशन ऑफ मेडिकल कन्सल्टंट्सचे माजी अध्यक्ष डॉ. दीपक बैद यांनी सांगितले, की या निर्णयाच्या विरोधामागे अनेक कारणे आहेत. केवळ डॉक्टरांवरच क्यूआर कोड बंधनकारक का केला जात आहे, अन्य व्यावसायिकांवरही हीच जबाबदारी का नाही, असे सवाल त्यांनी उपस्थित केले. त्याचप्रमाणे सध्या एमएमसीची निवडणूक झालेली नाही. त्यामुळे क्यूआर कोडसारखा महत्त्वाचा निर्णय प्रशासकाने न घेता निवडून आलेल्या समितीने घ्यावा, अशी मागणी त्यांनी केली. या प्रणालीमध्ये अनेक त्रुटी असल्याचाही त्यांनी संशय व्यक्त केला.
...
थर्ड पार्टीकडे माहिती गेल्याचा धोका - डॉ. संतोष कदम
इंडियन मेडिकल असोसिएशनच्या महाराष्ट्र शाखेचे अध्यक्ष डॉ. संतोष कदम यांनीही या व्यवस्थेचा विरोध केला आहे. एमएमसीने क्यूआर कोड तयार करण्याची जबाबदारी थर्ड पार्टीला दिली आहे. त्यामुळे डॉक्टरांची सर्व वैयक्तिक माहिती थेट त्या खासगी संस्थेकडे जात आहे. त्यामुळे या माहितीचा दुरुपयोग होण्याची शक्यता नाकारता येत नाही, असा इशारा त्यांनी दिला.