पाइपलाइनमुळे विसर्जन मार्ग बंद
मोहने गणेशघाट परिसरात खोदलेला रस्ता करण्याची शिवसेनेची मागणी
शिवसेना शाखाप्रमुख रोहन कोट यांचे केडीएमसी आयुक्तांना पत्र
कल्याण, ता. २९ (वार्ताहर) : मोहने येथील पाणीपुरवठा विभागाने पाइपलाइन टाकण्यासाठी खोदकाम केले आहे. या पाइपलाइनमुळे गणेश घाट येथे श्री गणेशमूर्ती विसर्जन करण्यासाठी अडथळा निर्माण झाला आहे. त्या ठिकाणी लवकरात लवकर पोहोच रस्ता तयार करण्यात यावा यासाठी मोहने प्रभाग क्रमांक १४ चे शिवसेना शिंदे गटाचे शाखाप्रमुख रोहन कोट यांनी केडीएमसी आयुक्तांना पत्र दिले आहे.
उल्हास नदीपात्रालगत असलेला मोहने गणेशघाटावर अनेक वर्षे श्री गणेशमूर्तीचे विसर्जन करण्यात येत आहे. त्यात घरगुती व गणेश मंडळाच्या मोठ्या मूर्तींचे विसर्जन मोठ्या संख्येने करण्यात येते, परंतु याच ठिकाणी अमृत योजनेअंतर्गत व उल्हास नदीपात्रातून अधिक पाणी इतर महानगरपालिका हद्दीत उपसा करण्यासाठी नवीन मोठ्या पाइपलाइन टाकण्यात आल्या आहेत. त्यामुळे गणेश विसर्जनाला अडथळा ठरणार आहे.
या ठिकाणची शाखाप्रमुख रोहन कोट यांनी पाहणी करून याबाबत गणेश विसर्जनापूर्वी हा अडथळा दूर करून त्या ठिकाणी गणेश घाटपर्यंत पोहोच रस्ता तयार करण्याची मागणी केली आहे. याबाबत त्यांनी आयुक्त, अतिरिक्त आयुक्त, शहर अभियंता, जल अभियंता, प्रोजेक्ट इंजिनिअर व अ प्रभाग सहाय्यक आयुक्त यांना लेखी निवेदन दिले आहे.