आर. बी. कारिया इंग्लिश स्कूलमध्ये कारगिल वीर जवानांना अभिवादन
कल्याण, ता. ३० (वार्ताहर) : देशप्रेम आणि अभिमानाने भरलेले वातावरण श्री. आर. बी. कारिया इंग्लिश स्कूलमध्ये कारगिल विजय दिवसानिमित्त पाहायला मिळाले. या विशेष दिवशी प्राचार्या दीपाली राजपूत यांच्या मार्गदर्शनाखाली व शाळेचे कमांडो ट्रेनर सचिन कन्नोर आणि सर्व शिक्षक व शिक्षकेतर कर्मचारी यांच्या उपस्थितीत, वीर जवानांना भावपूर्ण श्रद्धांजली अर्पण करण्यात आली.
कार्यक्रमाची सुरुवात देशभक्तीपर प्रार्थनेने झाली. विद्यार्थ्यांनी देशभक्तीपर भाषणे, कविता, गीते सादर करून आपली कृतज्ञता व्यक्त केली. देशासाठी प्राणार्पण केलेल्या शूर जवानांच्या सन्मानार्थ दोन मिनिटे मौन पाळण्यात आले. सचिन कन्नोर यांनी विद्यार्थ्यांना कारगिल युद्धातील शौर्यगाथा सांगत त्यांच्यात देशसेवेबद्दल प्रेरणा निर्माण केली. प्राचार्या दीपाली राजपूत यांनी विद्यार्थ्यांना शिस्त, एकता आणि राष्ट्रसेवा यांचे महत्त्व पटवून दिले. या दिवशी विद्यार्थ्यांनी आणि शिक्षकांनी एकत्र येऊन झेंड्याला मानवंदना दिली. देशभक्तीपर संचलनात सहभाग घेतला. संपूर्ण परिसरात अभिमान आणि आदराचे वातावरण निर्माण झाले होते. शाळेतून अशा उपक्रमांद्वारे विद्यार्थ्यांमध्ये राष्ट्रभक्तीची भावना जागृत ठेवण्याचा प्रयत्न सातत्याने केला जातो.