धबधबे, तलाव, गडकिल्ले परिसरात प्रवेशबंदी
मुरबाड, ता. ३० (बातमीदार) : ठाणे जिल्ह्यात विविध ठिकाणी असलेले धबधबे, तलाव आणि धरणाच्या सभोवताली एक किलोमीटर परिसरात प्रवेश करण्यास ठाणे जिल्हाधिकारी यांनी प्रतिबंधात्मक आदेश लागू केले आहेत. ठाणे जिल्ह्यातील ग्रामीण भागात असलेल्या १० पोलिस ठाण्यांतील हद्दीमत हे आदेश २५ सप्टेंबरच्या मध्यरात्रीपर्यंत लागू राहणार आहेत. टोकावडे पोलिस ठाण्याच्या हद्दीतील प्रसिद्ध माळशेज घाट, नाणेघाट मुरबाड पोलिस ठाण्याच्या हद्दीतील सिद्धगड, डोंगर न्हावे, सोनावळे, हरिश्चंद्रगड, बारवी धरण, पाडाळे धरण, गोरखगड या ठिकाणांचा समावेश आहे. बंदी घालण्यात आलेल्या पर्यटनस्थळांमध्ये शहापूर तालुक्यातील शहापूर, वासिंद, कसारा, किन्हवली, भिवंडीतील गणेशपुरी, पडघा तसेच कल्याण व अंबरनाथ तालुक्यातील विविध ठिकाणांचा समावेश आहे.
पावसामुळे वेगाने वाहणाऱ्या पाण्यात उतरणे किंवा पोहणे, धबधब्यावर जाणे अथवा पाण्याच्या प्रवाहाखाली बसणे, पावसामुळे धोकादायक झालेल्या ठिकाणी सेल्फी काढणे किंवा चित्रीकरण करणे, धबधब्याच्या परिसरात मद्यपान करणे, धोकादायक ठिकाणी वाहने थांबवणे, उघड्या जागेवर कचरा फेकणे तसेच ज्या कृतीमुळे ध्वनी, वायू व जलप्रदूषण होईल, अशा कृत्यांना मनाई केली आहे. पर्यटनाला चालना मिळावी व पर्यटकांना सोयीसुविधांचा लाभ मिळावा, यासाठी पर्यटनस्थळांचा विकास करणे व पर्यटकांना प्रोत्साहित करणे हे सरकारचे धोरण असले तरीसुद्धा अतिवृष्टी व पाण्याच्या प्रवाहामुळे जीवितहानी होण्याच्या घटना घडू नयेत, यासाठी पर्यटकांच्या सुरक्षिततेसाठी हे आदेश काढल्याचे आदेशात नमूद केले आहे.