पालघर, ता. ३१ (बातमीदार) : विरार-डहाणू आणि चर्चगेटदरम्यान प्रवास करणाऱ्या हजारो प्रवाशांच्या समस्या खासदार डॉ. हेमंत सवरा यांनी लोकसभेत मांडत लोकल ट्रेनची वारंवारिता आणि सुविधा वाढवण्याची मागणी केली.

विरार ते डहाणू मार्गावर प्रवासी संख्या मोठी असून, सकाळी आणि सायंकाळी पीक अवर्समध्ये प्रवास अत्यंत त्रासदायक बनतो. त्यामुळे गाड्यांची संख्या, डब्यांची क्षमता आणि स्थानकांवरील सुविधा तातडीने सुधाराव्यात, अशी मागणी खासदारांनी केली. या उपाययोजनांमुळे प्रवाशांचा त्रास कमी होईल, प्रवास वेळेत आणि सोयीस्कर होईल, तसेच उपनगरी भागाचा विकासही वेग घेईल, असा विश्वास खासदार डॉ. सवरा यांनी व्यक्त केला.

प्रमुख मागण्या :
- सकाळी सहा वाजल्यापासून आणि सायंकाळी गर्दीच्या कालावधीमध्ये अधिक गाड्या चालवाव्यात.
- १२ डब्यांच्या लोकल्सऐवजी १५ डब्यांच्या गाड्या चालवून गर्दी कमी करावी.
- विरार-डहाणू मार्गावर एसी लोकल्स, तसेच परवडणाऱ्या नॉन-एसी लोकल्सची संख्या वाढवावी.
- स्वच्छ स्वच्छतागृह, डिजिटल साइनबोर्ड आणि बसण्याची सोय स्थानकांच्या दोन्ही टोकांवर करावी.
- सकाळी चार वाजता डहाणूहून चर्चगेटकडे लोकल सुरू करावी आणि संध्याकाळी सहा वाजता विरारहून डहाणूकडे अतिरिक्त लोकल चालवावी. तसेच डहाणूपर्यंत चालणाऱ्या लोकल्स उंबरगावपर्यंत वाढवाव्यात.