पनवेल, ता. ३ (बातमीदार)ः महापालिका क्षेत्रातील मालमत्ताधारकांसाठी मालमत्ता कराची देयके महाराष्ट्र पालिका अधिनियम प्रकरण आठअंतर्गत कराधान नियम ५५ नुसार ऑनलाइन तसेच प्रत्यक्ष स्वरूपात भरण्याची सुविधा दिली आहे. त्यानुसार आर्थिक वर्ष २०२५-२६ साठी ३१ ऑगस्टपर्यंत एकरकमी कर भरणाऱ्यांना पाच टक्के सवलत दिली जाणार आहे.
महापालिका क्षेत्रातील मालमत्ता कराची देयके तयार करण्यात आलेली आहेत. ज्या मालमत्ताधारकांना मालमत्ताकराची देयके प्राप्त झालेली नाहीत, त्या मालमत्ताधारकांनी panvelmc.org किंवा PMC TAX - APP वर नोंदणी करून ऑनलाइन पद्धतीने मालमत्ता कराची देयके प्राप्त करून घ्यावीत. तसेच ज्या मालमत्ताधारकांना मालमत्ता कराची ऑनलाइन देयके घेणे शक्य नाही, अशा मालमत्ताधारकांनी संबंधित प्रभाग कार्यालयातून देयके घेण्याचे आवाहन करण्यात आले आहे.