नेरूळमध्ये अनोख्या पद्धतीने मैत्रीदिन
युवक, ज्येष्ठांनी घेतली एकमेकांची काळजी घेण्याची शपथ
जुईनगर, ता. ४ (बातमीदार) : नेरूळमधील पंडित भगत उद्यानात यंदा ‘मैत्रीदिन’ अत्यंत अनोख्या व हृदयस्पर्शी पद्धतीने साजरा करण्यात आला. भारतात दरवर्षी ऑगस्ट महिन्याच्या पहिल्या रविवारी मैत्रीदिन साजरा करण्याची परंपरा आहे. यंदा (ता. ३) नेरूळ सेक्टर १२ मधील नागरिकांनी केवळ संदेश पाठवणे, भेटवस्तू देणे, फिरायला जाणे एवढ्यावरच न थांबता एक सशक्त सामाजिक बंध तयार करीत ‘मैत्री’चा खरा अर्थ समजावून दिला.
सकाळी नियमितपणे व्यायामासाठी एकत्र येणाऱ्या ज्येष्ठ नागरिक, गृहिणी, विद्यार्थी आणि इतर सदस्यांनी ‘नेरूळ गार्डन ग्रुप’ या नावाने गेल्या १२ वर्षांत एक मैत्रीचा सशक्त मंच उभा केला आहे. मुळात व्यायामासाठी सुरू झालेला सहवास आता एकमेकांच्या सुखदुःखात सहभागी होणाऱ्या परिवारात परिवर्तित झाला आहे. मैत्रीदिनानिमित्त रविवारी सर्व सदस्यांनी एकत्र येत प्रार्थनेने सुरुवात केली आणि १२ वर्षीय विधी साळुंखेपासून ७२ वर्षीय परशुराम मोटे यांच्यापर्यंत प्रत्येकाने एकमेकांची काळजी घेण्याची शपथ घेतली.
या उपक्रमामध्ये उद्यानाचे माळी, सुरक्षा रक्षक, पालिका कर्मचारीदेखील सहभागी झाले होते. एकमेकांना मैत्रीधागा बांधण्यात आला, वाढदिवसाच्या शुभेच्छा देण्यात आल्या आणि गोडधोड अल्पोहाराचा आस्वाद घेण्यात आला. या गटाने गरजूंसाठी दरमहा १०० रुपयांची देणगी जमा करून अन्न, कपडे, आर्थिक मदत असा समाजोपयोगी उपक्रम सुरू ठेवला आहे. ज्येष्ठ सदस्यांचे वाढदिवस साजरे करणे, आजारी सदस्यांची शुश्रुषा करणे, गरजूंना मदत करणे ही या ग्रुपची विशेषत: आहे.