खोपटा जंक्शन अखेर खड्डेमुक्त
सिडकोकडून काँक्रीटीकरणाला सुरुवात
उरण, ता. ६ (वार्ताहर)ः खोपटा-नवघर आणि करंजा-पागोटे जंक्शन यांना जोडणाऱ्या खोपटा जंक्शनच्या काँक्रीटीकरणाला सुरुवात झाली आहे. त्यामुळे गेल्या अनेक दिवसांपासून खड्ड्यांमधून होणाऱ्या प्रवासातून वाहनचालकांची सुटका होणार आहे.
या खोपटा जंक्शनवर अवजड वाहनांची प्रचंड वर्दळ असते. सध्या या जंक्शनच्या काँक्रीटीकरणाचे काम सुरू असल्यामुळे काही प्रमाणात वाहतूक वळविण्यात आली आहे. या जंक्शनवरून जेएनपीए, द्रोणागिरी, मुंबई, पळस्पे, नवघरकडे तसेच जेएनपीए बाजूने चिरनेर, खोपटा तसेच अलिबाग, पेण या बाजूला जाणाऱ्या वाहनांची प्रचंड वर्दळ असते. वाहने वळताना चाकांचे घर्षण होऊन येथील रस्ता खराब होत आहे. खड्ड्यांमुळे झालेल्या अपघातांत अनेकांना जीव गमवावा लागला आहे. त्यामुळे कायमस्वरूपी उपाययोजना करावी, अशी मागणी सातत्याने करण्यात येत होती.
--------------------------
पागोटे जंक्शनची लवकरच दुरुस्ती
खोपटा जंक्शनवरच्या खड्ड्यांवर कायमस्वरूपी उपाय म्हणून येथे उच्च प्रतीचे काँक्रीटीकरण करण्यात येणार आहे. तसेच खोपटा जंक्शनप्रमाणे पागोटे जंक्शनचीदेखील लवकरच दुरुस्ती करण्यात येणार असून त्यासाठीची निविदा प्रक्रिया सुरू असल्याचे सिडकोचे कार्यकारी अभियंता राजेंद्र रेडे यांनी सांगितले.