उल्हासनगर, ता. ७ (वार्ताहर) : शहराच्या मध्यवर्ती भागात असलेल्या चहा दुकानातील मालकावर दोन सराईत गुन्हेगारांनी चाकूने हल्ला करण्याचा प्रयत्न केला. या घटनेने स्थानिक व्यापाऱ्यांमध्ये खळबळ उडाली आहे. गुन्हेगारी टोळ्यांचा वाढता प्रभाव आणि पोलिस प्रशासनाची ढिसाळ भूमिका यावर पुन्हा एकदा गंभीर प्रश्न उपस्थित झाले आहेत.
उल्हासनगर शहरातील कॅम्प ३ परिसरात चंदीबाई कॉलेजसमोर ‘मोरे चहा’ दुकान आहे. या चहाविक्रेत्यावर बुधवारी भरदिवसा दोन कुख्यात गुन्हेगारांनी चाकूने हल्ला करण्याचा प्रयत्न केला. ‘राम नाश्ता हाऊस’ येथे मॉन्टी करोतीया आणि त्याचा साथीदार हे दोघे नाश्ता करण्यासाठी आले होते. दुकानात काम करणाऱ्या सुरजित यादव याच्याकडून कांदा देण्यास उशीर झाला, यावरून अचानक दोघांनी त्याच्यावर हात उचलला. तणाव वाढू लागल्याने ‘मोरे चहा’चे मालक पुंडलिक मोरे हे मध्यस्थी करायला पुढे सरसावले. मात्र, मॉन्टी करोतीया याने चाकूने त्यां‍च्यावर हल्ला करण्याचा प्रयत्न केला. प्रसंगावधान राखून शेजारील दुकानदारांनी तत्काळ हस्तक्षेप करत मोरे यांचा जीव वाचवला. या संपूर्ण घटनेचा थरार सीसीटीव्हीत कैद झाला आहे. हे व्हिडीओ फुटेज सध्या समाजमाध्यमांवर व्हायरल होत आहे. त्यामुळे नागरिक आणि व्यापाऱ्यांमध्ये संतापाची लाट उसळली आहे.
याप्रकरणी मध्यवर्ती पोलिसांनी दोघांविरोधात गुन्हा नोंदवला आहे. विशेष म्हणजे, या प्रकरणातील एक आरोपी हा नुकताच एका खुनाच्या गुन्ह्यातून जामिनावर सुटला असून तो खुलेआम दहशत माजवत आहे.