रेल्वेत नोकरीच्या प्रलोभनातून फसवणूक
सकाळ वृत्तसेवा
डोंबिवली, ता. ७ : रेल्वेत तिकीट तपासनीस म्हणून नोकरीला लावतो, असे सांगत एकाने बेरोजगार तरुण व त्यांच्या पालकांना लाखो रुपयांना गंडा घातला आहे. याप्रकरणी खडकपाडा, मानपाडा पोलिस ठाण्यात तक्रार दाखल केली होती. मानपाडा पोलिसांनी डोंबिवली पश्चिमेतील राजूनगर भागातून एका २७ वर्षीय व्यक्तीला अटक केली आहे. विशाल वसंत विधाते असे अटक आरोपीचे नाव आहे.

मोहने येथील प्रथमेश मोरे हा खडकपाडा पोलिस ठाण्यात सोमवारी (ता. ४) विशाल याच्याविरोधात फसवणुकीची तक्रार दाखल केली आहे. दाखल तक्रारीनुसार डोंबिवलीतील विधाने हा रेल्वेत तरुणांना नोकरीला लावतात, अशी माहिती मिळाली होती. आठ महिन्यांपूर्वी प्रथमेश हा विशाल विधाते याच्या संपर्कात आला. रेल्वेत नोकरीला लावतो, असे आश्वासन त्याने प्रथमेशला दिले. त्याचा विश्वास संपादन करत टप्प्याटप्याने एकूण पाच लाख रुपये प्रथमेशकडून घेतले. पैसे भरले पण नोकरीचे नियुक्तिपत्र न आल्याने ते कधी येणार, असा तगादा प्रथमेशने विशाल विधाते याच्याकडे लावला. नोकरी देणार नसाल तर पैसे परत करा, असे सांगू लागला; मात्र नंतर वसंत याने त्यांचा मोबाईल नंबर बंद केला. यामुळे फसवणूक झाल्याचे लक्षात आल्यावर खडकपाडा पोलिस ठाण्यात तक्रार दाखल केली.

आरोपीला अटक
सहाय्यक पोलिस निरीक्षक प्रवीण बाकल या प्रकरणाचा तपास करत आहेत. विशाल विधातेला अशाच एका फसवणूक प्रकरणात मानपाडा पोलिसांनी अटक केली आहे. मानपाडा पोलिसांची चौकशी पूर्ण झाल्यानंतर खडकपाडा पोलिस त्याच्या तपासासाठी विशाल विधातेचा ताबा घेतील, अशी माहिती एका पोलिस अधिकाऱ्याने दिली. विशाल विधातेने पंधराहून अधिक तरुणांची फसवणूक केल्याची चर्चा आहे.