कळंबोली वसाहतीत मनस्ताप
अंतर्गत रस्त्यांच्या काँक्रीटीकरणामुळे अडथळे
पनवेल ता. ७ (बातमीदार)ः कळंबोली वसाहतीमध्ये रस्त्यांची कामे मोठ्या प्रमाणात सुरू आहेत. काँक्रीटीकरणाच्या कामांमुळे अंतर्गत रस्त्यांवर वाहतूक कोंडी उद्भवत असून, सणासुदीच्या काळातच रहिवाशांना विविध अडचणींचा सामना करावा लागणार आहे.
कळंबोली वसाहतीतील करवली चौक ते एमजीएम हॉस्पिटलदरम्यान रस्त्याच्या काँक्रीटीकरणाचे काम सुरू आहे. परिणामी, एकेरी वाहतूक सुरू आहे. त्याच ठिकाणी एका बाजूला वाहने पार्किंग केले जातात. त्यामुळे सायंकाळी मोठ्या प्रमाणात वाहतूक कोंडी होत आहे. या मुख्य मार्गावर दोन ठिकाणी क्रॉसिंग आहे. त्यामध्ये सेंट जोसेफ ते सुधागड स्कूल हा एक अंतर्गत रस्ता असून, दुसरा रोड हिंदुस्तान बँक ते न्यू इंग्लिश स्कूलकडे जातो. दोन्ही ठिकाणी मोठ्या प्रमाणात वाहने अडकून राहतात. दरम्यान, महापालिकेनेसुद्धा यासंदर्भात कोणताही उपाययोजना केलेली नाही. परिणामी २०० ते ३०० मीटर अंतरासाठी २० ते ३० मिनिटे वेळ खर्च होत आहे.
---------------------------------
पालिकेचे दुर्लक्ष
एनएमएमटीची बससेवा येथूनच सुरू आहे. बस डेपो रस्त्यालगत आहे. बस वळताना वाहनांच्या रांगा लागतात. याव्यतिरिक्त प्रवासी वाहनेही येथूनच ये-जा करतात. याशिवाय जेसीबी, हायड्रा, सिमेंट मिक्सर, बांधकाम साहित्य भरून आलेली इतर वाहने यांचीही वर्दळ सुरू असते. त्यामुळे कळंबोलीकरांना विविध अडचणींचा सामना करावा लागत आहे. पनवेल पालिकेशी समन्वय साधून रस्त्याचे काम होईपर्यंत काहीतरी उपाययोजना करावी, अशी मागणी स्थानिक रहिवाशांनी केली आहे.
-------------------------------------
कळंबोली वसाहतीमध्ये रस्त्यांचे काँक्रीकरण हाती घेण्यात आले आहे, परंतु नियोजन करण्यात आलेले नाही. महापालिकेचे ठेकेदार वाटेल तेव्हा वाटेल तिथे रस्त्याचे काम करतात. एकेरी वाहतूक सुरू करतात. त्यामुळे सणासुदीच्या पार्श्वभूमीवर रहदारीमध्ये अडथळे उद्भवणार आहेत. त्यामुळे सर्व यंत्रणांनी समन्वय साधावा, या उद्देशाने पत्रव्यवहार केला आहे.
- तुकाराम सरक, शिवसेना शहरप्रमुख, कळंबोली