गोळीबारप्रकरणी सीबीआय तपास व्हावा!
महेश गायकवाड यांची उच्च न्यायालयात याचिका
कल्याण, ता. ७ (बातमीदार) : कल्याण पूर्वचे माजी आमदार गणपत गायकवाड यांनी केलेल्या गोळीबार प्रकरणाचा तपास योग्यरीत्या झाला नाही. त्यामुळे याप्रकरणी सीबीआय किंवा एसआयटीमार्फत तपास करण्यात यावा, अशी मागणी करणारी याचिका माजी नगरसेवक महेश गायकवाड यांनी मुंबई उच्च न्यायालयात दाखल केली. न्यायालयाने तपास अधिकारी आणि राज्य सरकारला नोटीस जारी करून भूमिका स्पष्ट करण्याचे आदेश दिले.
महेश गायकवाड यांच्यामार्फत ॲड. अभिषेक कुलकर्णी यांनी दाखल केलेल्या याचिकेत म्हटले, की मुख्य आरोपी गणपत गायकवाड हे घटनेवेळी आमदार होते. त्यांनी राजकीय विरोधातून महेश गायकवाड यांच्यावर जाणीवपूर्वक गोळीबार केला होता. ही घटना वरिष्ठ पोलिस निरीक्षक अनिल जगताप यांच्या दालनात पोलिसांसमक्ष घडली. या प्रकरणाचा तपास योग्यरीत्या झाला नाही. गुन्हे शाखेने हल्ला आणि खुनाचा प्रयत्न यासंबंधीचे सर्व पैलू तपासलेले नाहीत. शिवाय गणपत गायकवाड आणि सहआरोपींवर अनेक महत्त्वाची कलमे लावण्यात आलेली नाही. तसेच सर्व आरोपींना अटक झाली नसल्याचे आणि वैभव गायकवाड यांना क्लीन चिट दिल्याचे याचिकेत म्हटले आहे. याप्रकरणी न्या. रवींद्र घुगे आणि न्या. गौतम अंकढ यांच्या खंडपीठाने उल्हासनगरचे तपास अधिकारी आणि महाराष्ट्र सरकारला नोटीस जारी करून उत्तर दाखल करण्याचे आदेश दिले आणि सुनावणी २५ ऑगस्टपर्यंत तहकूब केली.