महागाईतही रक्षाबंधनाला बहिणींची गर्दी
राख्यांच्या किमतीत २० ते २५ टक्के वाढ

जीवन तांबे
चेंबूर, ता. ७ : रक्षाबंधन सणानिमित्त बाजारात विविध प्रकारच्या राख्या दाखल झाल्या आहेत. मात्र यंदा राख्यांच्या किमतीत २० ते २५ टक्के वाढ झाली असली तरी खरेदीदारांनी राखी खरेदीकरिता बाजारात मोठी गर्दी केली आहे. रक्षाबंधन लोकप्रिय सण आहे. त्यामुळे महाराष्ट्र व इतर राज्यांत हा सण मोठ्या उत्साहात साजरा केला जातो. बहीण या दिवशी भावाला ओवाळून त्याच्या हातावर राखी बांधते आणि आपले भावाविषयी प्रेम व्यक्त करते. या सणानिमित्त गोंडा राखी, मीनाकारी, चंदनाच्या, नक्षीकाम केलेल्या व लाबुबू बाहुली व लुंबा राख्या, कार्टून कॅरेक्टर्स, घड्याळ ब्रेसलेट, ॲपल फोन, ब्रेसलेट, ईव्हील आय, रुद्राक्ष आणि मोती राखी व बांबू राखी यासारख्या पर्यावरणपूरक, नावीन्यपूर्ण, खाद्य पदार्थ राख्या व पारंपरिक अशा विविध प्रकारच्या राख्या उपलब्ध आहेत.
विशेषतः लहान मुलांकरिता कार्टून व खेळण्याच्या स्वरूपातील राख्यांना अधिक मागणी आहे. गेल्या वर्षीच्या तुलनेत यंदा राख्यांच्या किमतीत २० ते २५ वाढ झाली असून, मुंबई व उपनगरांतील राख्या विक्रीची बाजारपेठ व दुकाने सजली असून, आकर्षक राख्यांनी महिलांसह बच्चेकंपनीना भुरळ घातली असल्याने राखीखरेदी करण्याकरिता गर्दी केली आहे. राख्यांच्या किमतीत वाढ झाली असली तरी राख्यांची मागणी वाढलेली आहे.
.…..........
१) लाबूबु चायना - किंमत २५० ते १,००० रुपये
२) राखी गेम किंमत
१३० ते २०० रुपये
३) लहान कार्टून
किंमत - ६० ते१०० रुपये
४) कीचेन राखी किंमत -
८० ते २०० रुपये
५) गोंडा राखी
किंमत ६० ते १०० रुपये
६ ) ब्रेसलेट राखी - १५० ते ५०० रुपये
७) ईव्हील आय - किंमत ४०० ते १,००० रुपये
८) मिनाकारी राखी - किंमत ५०० ते १,००० रुपये
९) चंदन नक्षीकाम राखी
किंमत २०० ते १,००० रुपये
१०) रुद्राक्ष आणि मोती राखी - किंमत २५ ते १,००० रुपये
.........................................

राख्यांच्या किमतीत २० ते २५ टक्क्यांनी वाढ झालेली आहे. यंदा नवनवीन राख्यांचा ट्रेंड आलेला आहे. महिला व बच्चेकंपनीकडून राख्यांना मोठी मागणी आहे. त्यामुळे दुकानदारांमध्ये आनंदाचे वातावरण दिसत आहे.
- हरिश सिंग, राखी विक्रेते
....................................

राख्यांच्या किमती खूप वाढलेल्या आहेत. आम्ही महिला कमी किमतीच्या राख्या खरेदी करतो. मात्र लहान मुली व मुलांच्या हट्टापायी भरमसाठ किमतीच्या राख्या खरेदी कराव्या लागत आहेत.
- राजश्री कदम, गृहिणी