पालिकेसाठी ठाकरेंचे मराठीचे सोंग
मागाठाणेत प्रवीण दरेकर यांचे युतीच्या चर्चांवर वक्‍तव्य
मुंबई, ता. ७ : महापालिका निवडणुका चार-पाच महिन्यांवर आल्याने ठाकरे बंधू मराठीबद्दल पुळका दाखवत आहेत. मात्र ही त्यांची सर्व सोंगेढोंगे आपण निवडणुकीत उघडी पाडू, असा इशारा भाजपचे विधान परिषदेतील गटनेते प्रवीण दरेकर यांनी दिला.
मागाठाणे येथे भाजपच्या प्रभाग आणि विधानसभा पदाधिकाऱ्यांच्या नावाची घोषणा केल्यानंतर ते बोलत होते. पद कुठलेही असले तरी पदाच्या माध्यमातून पक्ष संघटना मजबूत करणे, पक्षाची वाढ करणे, संघटनेत सर्वांना बरोबर घेऊन पक्षबांधणी करणे ही कामे या पदाधिकाऱ्यांनी केली पाहिजेत. आपल्यात मतभेद असू शकतात मात्र मनभेद नसावेत, असा सल्लाही त्यांनी या वेळी पदाधिकाऱ्यांना दिला.
तुम्ही ज्या पदांवर काम करणार आहात तो सुवर्णकाळ आहे. केंद्रात आणि राज्यात आपली सत्ता असून, मुंबई महापालिकेतही भाजप सर्वात मोठा पक्ष आहे. अशा परिस्थितीत आपण लोकांना काही देऊ शकलो नाही तर जनता आपल्याला माफ करणार नाही. त्यासाठी नवनियुक्त पदाधिकाऱ्यांनी रचनात्मक काम करावे. पद छोटे आहे की मोठे यापेक्षा मी त्या पदाला न्याय देतो का, हा विचार करून त्यानुसार कार्यकर्त्यांनी काम करावे, असेही ते म्हणाले.
माणूस कामाने मोठा होतो, पदाने नाही. अनेक मान्यवर केव्हाही आमदार-खासदार झाले नाहीत, तरीही आपण त्यांचे पुतळे उभारतो. त्यामुळे नव्या पदाधिकाऱ्यांनी स्वतःचे मूल्यमापन करावे. कामासाठी स्पर्धा करावी. ती स्पर्धा एकमेकांची तंगडी ओढणारी नसावी. मुख्यमंत्र्यांसह आपण सर्वजण तुमच्या पाठीशी आहोत. त्यामुळे संघटना मजबूत करा, असा सल्लाही दरेकर यांनी दिला.

दारूगोळा भरून तयार
येत्या महापालिका निवडणुकीसाठी आपण दारूगोळा भरून ठेवला आहे. दोन्ही ठाकरे बंधूंची घरे मला माहीत आहेत. त्यांची भांडणे काय ते मला माहीत असून, हे सर्व मी बाहेर काढणार आहे.
मुंबई महाराष्ट्रापासून कोणीही तोडणार नाही, असे मुख्यमंत्री देवेंद्र फडणवीस यांनीही सांगितले आहे. तरीही पावसाळ्यात बेडकं बाहेर येतात तसे निवडणुका जवळ आल्या की काही लोक मुंबई धोक्यात असल्याची आवई उठवतात. त्यांचे राजकीय भवितव्य उजाड झाल्याने भावनिक विषय काढण्यासह शेवटचा प्रयत्न सुरू असल्याचा टोलाही दरेकर यांनी लगावला.