शिक्षण अधिकाऱ्यांत संताप
आजपासून बेमुदत काम बंद आंदोलन

मुंबई, ता. ७ ः शालार्थ आयडीसह इतर मान्यताप्रकरणी शालेय शिक्षण विभागातील अधिकाऱ्यांना विविध यंत्रणांच्या माध्यमातून नाहक त्रास दिला जात आहे. ज्या विषयाशी संबंध नाही अशा विषयांसाठी अटकेपासून ते इतर प्रकारच्या कारवाया केल्या जात असल्याने याविरोधात शालेय शिक्षण विभागातील अ आणि ब दर्जाच्या सुमारे ४००हून अधिक अधिकाऱ्यांनी शुक्रवारपासून (ता. ८) बेमुदत काम बंद आंदोलन पुकारले आहे.
या आंदोलनामुळे शिक्षण विभागातील कामकाज मोठ्या प्रमाणात ठप्प होण्याची शक्यता वर्तविण्यात येत आहे. शालेय शिक्षण विभागातील तीन उपसंचालक, दोन शिक्षणाधिकाऱ्यांना कोणतीही पूर्वचौकशी, कारणे दाखवा नोटीस असे काही न बजावता अटक करण्यात आले. त्यानंतर त्यांचे निलंबन झाले. शालार्थ आयडी प्रकरणात हे अधिकारी तपास यंत्रणांना सहकार्य करीत असतानाही त्यांच्यावर कारवाई करण्यात आली. कोणताही फौजदारी गुन्हा सिद्ध झालेला नसताना त्यांचे निलंबन करण्यात आल्याने शिक्षण विभागातील अधिकाऱ्यांचे मनोबल खचले असून, याचा कामकाजावर परिणाम होत असल्याचे अधिकाऱ्यांचे म्हणणे आहे. प्रामाणिक अधिकाऱ्यांचे संरक्षण करणे सरकारची जबाबदारी असल्याने सरकारकडून चौकशीविना अटक व बेकायदा निलंबन याबाबत हमी मिळावी, या मागणीसाठी काम बंद आंदोलन पुकारले असल्याचेही संघटनेकडून सांगण्यात आले.
...
मुख्याध्यापक महामंडळाचा जाहीर पाठिंबा
अखिल महाराष्ट्र शिक्षण सेवा राजपत्रित अधिकारी संघाने हे काम बंद आंदोलन पुकारले असून, या आंदोलनाला महाराष्ट्र राज्य माध्यमिक व उच्च माध्यमिक शाळा मुख्याध्यापक संघ महामंडळानेही जाहीर पाठिंबा देत अधिकाऱ्यांच्या बाजूने आपली भूमिका जाहीर केली आहे. बोगस शालार्थ आयडी प्रकरणात जे दोषी असतील त्यांच्यावर कारवाई झाली पाहिजे, मात्र सत्यता तपासून गुन्हे दाखल करावेत. यामुळे संस्थाचालक, अधिकाऱ्यांमध्ये दहशतीचे वातावरण निर्माण झाले असल्याने याचा कामकाजावर विपरीत परिणाम होत असल्याचे मुख्याध्यापक महामंडळाचे अध्यक्ष तानाजी माने यांनी सांगितले.