नवजात बालकांच्या तस्करीचे रॅकेट उघड
चौघा जणांना अटक

चेंबूर, ता. ७ (बातमीदार) ः शिवाजीनगर परिसरात नवजात बालकाची तस्करी करणाऱ्या रॅकेटचा पर्दाफाश करण्यात आला आहे. पोलिसांनी सहा दिवसांच्या नवजात बालकाची सुखरूप सुटका करून चार जणांना अटक केली. मुख्य सूत्रधाराचा शोध सुरू आहे. नाझिमा शेख ऊर्फ नसरीन, फातिमा महमुबली, इरफान खान, सुमैया खान अशी अटक करण्यात आलेल्या आरोपींची नावे आहेत.
शिवाजीनगर पोलिस ठाण्याच्या हद्दीत बुधवारी (ता. ६) रात्री एका नवजात बालकाची तस्करी करण्यात येत असल्याची माहिती सामाजिक कार्यकर्ते डॉ. बिनू वर्गीस यांना स्थानिक सूत्राकडून मिळाली. याबाबत त्यांनी मुंबई पोलिसांच्या वरिष्ठ अधिकाऱ्यांना माहिती दिली. त्याप्रमाणे मुंबई पोलिसांच्या सूचनेप्रमाणे शिवाजीनगर पोलिसांनी तातडीने कारवाई सुरू करून एकूण ४.५ लाख रुपये घेताना दोन महिला आरोपींना रंगेहाथ पकडले. शिवाजीनगर पोलिसांनी कसून चौकशी केल्यावर या व्यवहारात एक लाख रुपयांची आगाऊ रक्कम आधीच देण्यात आली होती. अटक करण्यात आलेल्या आरोपींकडून समिरा ऊर्फ नबील रिझवान शेखचे नाव समोर आले आहे. जो परिसरातील कुख्यात गुन्हेगार राजा ऊर्फ कौवाचा नातेवाईक आहे. समिराला यापूर्वीही अशाच प्रकारच्या प्रकरणांमध्ये अटक करण्यात आली होती. पोलिसांनी चार आरोपी व नवजात बाळाच्या पालकांविरुद्ध गुन्हा दाखल केला आहे. मुख्य आरोपी समिरा ऊर्फ नबील शेख सध्या फरार आहे. पोलिस त्याचा शोध घेत असल्याची माहिती शिवाजीनगर पोलिसांनी दिली आहे.