भावाचे बहिणीसाठी यकृतदान
दुर्मिळ विल्सन आजाराने ग्रस्त बहिणीला दिली नवीन संधी
सकाळ वृत्तसेवा
मुंबई, ता. ८ : गुजरातमधील पालनपूर शहरातील ३२ वर्षीय भावाने आपल्या लहान बहिणीचा यकृतदानाने जीव वाचवला. २७ वर्षीय हुमेराचे विल्सन या दुर्मिळ आजाराने यकृत निकामी झाले होते. रक्षाबंधनाचे औचित्य साधून भावाने आपल्या बहिणीप्रति प्रेमत्वाची भावना सिद्ध केली. हा आजार आनुवंशिक असून उपचार न केल्यास यकृत निकामी होणे, न्यूरोलॉजिकल समस्या आणि मृत्यूदेखील होऊ शकतो. हुमेराचा आजार कावीळ आणि सिरोसिसच्या टप्प्यात असल्याने तिला यकृत प्रत्यारोपणाची आवश्यकता होती.
फोर्टिस मुलुंडचे संचालक आणि मुख्य सर्जन - यकृत प्रत्यारोपण आणि एचपीबी सर्जरी डॉ. विक्रम राऊत यांनी त्यांच्या टीमसह ही जटिल शस्त्रक्रिया यशस्वीरीत्या पूर्ण केली, ज्यामुळे प्राप्तकर्ता आणि दाता दोघांनाही फायदा झाला. २०१७ मध्ये त्यांचा मोठा भाऊ ओवैसला विल्सन रोगाचे निदान झाले. त्याच्या निदानानंतर, सर्वात धाकटी, हुमेरा हिचीही चाचणी पॉझिटिव्ह आली. २०१८ मध्ये तिचा औषधोपचार सुरू केला; पण कालांतराने तिची तब्येत बिघडली, त्यामुळे भावाने तिला यकृतदान करण्याचा निर्णय घेतला. दरम्‍यान, ती माझी बहीण आहे आणि मला तिला वाचवण्याबद्दल विचार करावा लागला नाही, असे पीडित बहिणीचा भाऊ अनस याने सांगितले.
..............................
२०१८ मध्ये चेलेशन उपचार सुरू करूनही, हुमेराची प्रकृती अधिकच बिकट झाली आणि यकृत प्रत्यारोपण हा एकमेव पर्याय उपलब्ध होता. आम्ही प्रत्यारोपणासाठी तिच्या भावाच्या यकृताच्या डाव्या भागाचा वापर केला. दोन्ही भावंडे आता बरे होण्याच्या मार्गावर असल्याने, हे रक्षाबंधन खूप खास आहे.
- डॉ. विक्रम राऊत, यकृत प्रत्यारोपण आणि एचपीबी सर्जरी