शिवसेनेच्या पदाधिकाऱ्याला छत्रीने मारहाण; सीसीटीव्ही फुटेज व्हायरल
डोंबिवली, ता. ८ : डोंबिवली-बदलापूर पाइपलाइन रोडवरील नेवाळी नाका येथील शिंदेंच्या शिवसेनेचे अंबरनाथ तालुकाप्रमुख आणि पदाधिकारी चैनू जाधव यांना एका महिलेने छत्रीने मारहाण केल्याची घटना घडली आहे. या घटनेचे सीसीटीव्ही फुटेज समाजमाध्यमातून व्हायरल होत आहे. या फुटेजमध्ये चैनू यांचा किररोळ कारणावरून दुकानदारांबरोबर वाद झाला. या वादाचे रूपांतर पुढे मारामारीत झाले. चैनू यांनी प्रथम एका व्यक्तीच्या कानाखाली मारल्याचे दिसते. यानंतर दुकानातील महिलेने बाजूलाच पडलेल्या छत्रीने चैनू यांना मारहाण केली. याचे सीसीटीव्ही फुटेज व्हायरल झाले आहे. यातून जाधव यांच्यावर जोरदार टीका होत असून, शिंदे गटाच्या पदाधिकाऱ्यांची दादागिरी सुरू असल्याचे बोलले जात आहे.