माणगाव, ता. ९ (वार्ताहर)ः तालुक्यातील उसरघर गावच्या हद्दीत गुरांच्या गोठ्यातून म्हैस आणि वासराची चोरी करण्यात आली होती. या प्रकरणात गोरेगाव पोलिसांनी एकाला अटक केली असून, दोन जण फरार आहेत.
उसरघर येथील बाबू खाडे यांनी गोरेगाव पोलिस ठाण्यात गुरे चोरीला गेल्याची तक्रार नोंदवली होती. या प्रकरणात गुन्हा दाखल झाल्यानंतर गोरेगाव पोलिसांनी गोरेगाव, माणगाव, निजामपूर, पुणे, भीमा कोरेगाव, घोटावडे फाटा, पौड परिसरातील २५ ते ३० ठिकाणच्या सीसीटीव्ही फुटेजची पाहणी केली होती. त्यानंतर मिळालेल्या वाहनाच्या नंबरच्या आधारे इस्माईल लोखंडे (राहणार, वडवली, माणगाव) याला शिक्रापूर पुणे येथून अटक करण्यात आली.
----------------------------
१० लाखांचा मुद्देमाल हस्तगत
आरोपी रेकॉर्डवरील असल्याची माहिती पोलिसांना मिळाली. या घटनेतील आरोपी इप्तीकार लोखंडे, याला अटक करण्यात आली, तर त्याच्या दोन साथीदारांचा शोध सुरू आहे. आरोपीकडून एक म्हैस, एक वासरू, पिकअप असा १० लाख ८० हजारांचा मुद्देमाल हस्तगत केला.