अंबरनाथ, ता. ९ (वार्ताहर) : अंबरनाथ पूर्व येथील कैलासनगर, फार्मिंग सोसायटी येथे तारांगण फार्म हाऊससमोर सुरू असलेल्या एका जुगार अड्ड्यावर शिवाजीनगर पोलिसांनी छापा टाकून तीन जणांना अटक केली आहे. या कारवाईत पोलिसांनी जुगाराचे साहित्य आणि रोकड जप्त केली आहे.
शिवाजीनगर पोलिस ठाण्याचे कर्मचारी गुरुवारी (ता. ७) सायंकाळी ६.३०च्या सुमारास गस्त घालत असताना त्यांना पडक्या भिंतीच्या आडोशाला जुगार सुरू असल्याची माहिती मिळाली. त्यानंतर पोलिसांनी तत्काळ छापा टाकून कारवाई केली. या छाप्यात शांतीलाल जिवराज खोलीया (वय ७२), राजेश हसमुखभाई रमाणी (वय ४२) आणि रामजी तुलसी वाघेला (वय ७७) यांना तीन पत्ती खेळताना रंगेहाथ पकडले. याप्रकरणी शिवाजीनगर पोलिस ठाण्यात गुन्हा दाखल करण्यात आला असून, पुढील तपास सुरू आहे.