खेळांसंबंधी याचिका फेटाळली

मुंबई, ता. १० ः राष्ट्रीय खेळ हॉकीसह अन्य खेळांना प्रोत्साहन देण्यासाठी व्यापक योजना आखण्याच्या आणि त्याची अंमलबजावणी करण्याच्या आदेशाची मागणी करणारी जनहित याचिका उच्च न्यायालयाने नुकतीच फेटाळली. यासंदर्भात राज्य सरकारने आधीच पुरेशा उपाययोजना केल्याचे निरीक्षणही न्यायालयाने याचिका फेटाळून लावताना नोंदवले.
आधीपासूनच हॉकीसह अन्य खेळांना प्रोत्साहन देण्यासाठी योग्य ती पावले उचलली जात असल्याची माहिती राज्य सरकारने प्रतिज्ञापत्राद्वारे दिली. तसेच राज्यभरात क्रीडा संकुले बांधण्यात आली असून विविध खेळ खेळणाऱ्या २७० खेळाडूंना त्यांच्या कामगिरीबद्दल सुमारे १२.६८ कोटी रुपयांचा प्रोत्साहन भत्ता देण्यात आल्याची माहितीही सरकारच्या वतीने मुख्य न्या. आलोक आराधे आणि न्या. संदीप मारणे यांच्या खंडपीठाला देण्यात आली. त्यामुळे या जनहित याचिकेत पुढील कोणतेही आदेश देण्याची आवश्यकता नाही, असे निरीक्षणही नोंदवून खंडपीठाने याचिका निकाली काढली.