संत परंपरेची १२५ वर्षांपासून परंपरा
दिवाळे कोळीवाड्यातील अखंड हरिनाम सप्ताह सुरू
तुर्भे, ता. ११ (बातमीदार): दिवाळे कोळीवाड्यातील श्री हनुमान मंदिरात अखंड हरिनाम सप्ताह सोहळ्याला रविवारी (ता. १०) भक्तिमय वातावरणात सुरुवात झाली. या सोहळ्याला १२५ वर्षांची परंपरा लाभली आहे.
नवी मुंबई शहरातील दिवाळे कोळीवाड्यात सत परंपरेची आध्यात्मिक परंपरा आजही जोपासली जात आहे. विठ्ठलनामाचा गजर करीत हरिनामातून थोर संतांच्या विचाराचा वारसा नवीन पिढी पुढे घेऊन जात आहे. त्यामुळेच गावातील हरिनाम सप्ताह ग्रामस्थांचे श्रद्धास्थान आहे. यानिमित्ताने सकाळची काकडा आरती, ग्रंथराज ज्ञानेश्वरी पारायण, गाथा भजन, सायंकाळी हरिपाठ, कीर्तन, बॅण्ड वादन तसेच रात्री पंचक्रोशीत भजनी मंडळांच्या सादरीकरण असा दिनक्रम सध्या सुरू आहे. सात दिवस अखंड हरिनामाचा जयघोष असल्याने परिसरात भक्तिमय वातावरण आहे. सप्ताहानिमित्त मंदिराला केलेली आकर्षक सजावट, विद्युत रोषणाई आहे.
-----------------------------
श्रीकृष्ण जन्मोत्सव तयारी
सप्ताहनिमित्त विविध कार्यक्रम होतात. या काळात मंदिरात पहाटे ५ वाजता काकड आरती, संत तुकाराम गाथा भाजन, ज्ञानेश्वरी पारायण असते. दुपारी प्रवचन, सायंकाळी हरिपाठ होतात, तर सप्ताहाच्या शेवटच्या दिवशी शनिवार (ता. १६) रोजी गोकुळ अष्टमीच्या दिवशी रात्री १२ वाजता सारे गावकरी एकत्र येत श्रीकृष्ण जन्मोत्सव साजरा करण्यात येणार आहे. या वेळी संतमंडळी पारंपरिक वेशभूषा करणार असून, महिला तसेच भाविकांचे विविध खेळ आकर्षण राहणार आहे.
----------------------------------
राज्यभरातील कीर्तनकारांची हजेरी
पंचक्रोशीतील गजानन प्रासादिक भजन मंडळ, श्री संत ज्ञानेश्वर प्रासादिक भजन मंडळ, प्रेम सागर ब्रास बॅण्ड, शिव शंकर प्रासादिक भजन मंडळ, छाया कला सर्कल ब्रास बॅण्ड, हरी ॐ साई वारकरी भजन मंडळ, श्री साई कला सर्कल ब्रास बॅण्ड, श्री ज्ञानराज प्रासादिक भजन मंडळ, श्री कुलदैवत प्रासादिक भजन मंडळ वळप यांच्यासह राष्ट्रीय वारकरी कीर्तनकार हभप श्रीमती अश्विनी म्हात्रे यांचे कीर्तन सादर होणार आहे. त्यामुळे दिवाळे परिसर भक्तिरसात न्हाऊन निघाला आहे.