मध्य रेल्वेवर आज रात्रकालीन ब्लॉक
सकाळ वृत्तसेवा
मुंबई, ता. १५ ः मध्य रेल्वेच्या मुंबई विभागात विविध अभियांत्रिकी आणि देखभालीच्या कामांसाठी शनिवारी (ता. १६) रात्रकालीन ब्लॉक घेण्यात येणार आहे. कल्याण-कसारा तिसऱ्या मार्गाच्या कामाकरिता इलेक्ट्रॉनिक इंटरलॉकिंग करण्यात येणार आहे. या कामासाठी शनिवारी रात्री विशेष वीज आणि वाहतूक ब्लॉक घेण्यात येणार आहे. तर पश्चिम रेल्वेचा रविवारी ब्लॉक असेल. मध्य रेल्वेवर रविवारी ब्लॉक घेण्यात येणार आहे.

मध्य रेल्वे
कुठे : विद्याविहार ते ठाणेदरम्यान पाचव्या आणि सहाव्या मार्गिकेवर
कधी : शनिवारी रात्री १२.४० ते रविवारी पहाटे ४.४०वाजेपर्यंत
परिणाम : ब्लॉक कालावधीत लोकल आणि मेल-एक्स्प्रेसच्या वाहतुकीत बदल करण्यात आला आहे. ब्लॉकदरम्यान डाऊन पाचव्या मार्गावर धावणाऱ्या एक्स्प्रेस विद्याविहार ते कल्याण स्थानकांदरम्यान डाऊन जलद मार्गावर वळवण्यात येणार आहे. तसेच या गाड्या ब्लॉकदरम्यान १० ते १५ मिनिटे उशिरा धावतील. अप मार्गावरील एक्स्प्रेस कल्याण-दिवा ते विद्याविहार स्थानकांदरम्यान अप जलद मार्गावरून धावतील.

मध्य रेल्वे
कुठे : कल्याण-कसारा स्थानकादरम्यान
कधी : शनिवारी रात्री साडेबारा ते रविवारी पहाटे सव्वापाच वाजेपर्यंत
परिणाम : ब्लॉकदरम्यान सीएसएमटी ते कसारा लोकल सीएसएमटी स्थानकातून रात्री १०.४७ आणि रात्री १२.०८ वाजता चालविण्यात येईल. तसेच कसारा-सीएसएमटी लोकल रविवारी पहाटे ३.५१ आणि ४.५९ वाजता चालविण्यात येणार आहे. लांब पल्ल्याच्या गाड्या विलंबाने धावतील.

पश्चिम रेल्वे
कुठे : बोरिवली ते गोरेगाव स्थानकांदरम्यान
कधी : सकाळी १० ते दुपारी ३ वाजेपर्यंत
परिणाम : ब्लॉकदरम्यान अप-डाऊन जलद मार्गावरील सर्व लोकल गोरेगाव ते बोरिवली स्थानकांदरम्यान धीम्या मार्गावरून चालविण्यात येणार आहे. तसेच अप-डाऊन मार्गावरील काही लोकल रद्द केल्या असून काही लोकल अंधेरी, बोरिवली या हार्बर मार्गावरील गोरेगाव स्थानकांपर्यंत चालविण्यात येणार आहेत.