कराटे स्पर्धेत अनंत तिवारीने जिंकले रौप्य व कांस्यपदक
घाटकोपर, ता. १८ (बातमीदार) ः बालविकास विद्यालय, जोगेश्वरी येथे आयोजित डोजो युनिटी कप २०२५ इंटरडोजो कराटे स्पर्धेत अनंत वेदप्रकाश तिवारीने उल्लेखनीय कामगिरी करत दोन पदके मिळवली. फक्त आठ ते नऊ वर्षे वयोगटात खेळताना आणि इयत्ता तिसरीचा विद्यार्थी असूनही अनंतने आपली उत्तम तंत्रकौशल्ये व शिस्त याच्या जोरावर सर्वांचे लक्ष वेधले. त्याने कुमिते प्रकारात रौप्यपदक, तर काता प्रकारात कांस्यपदक पटकावले. या स्पर्धेत विविध शाळांमधून मोठ्या संख्येने खेळाडूंनी सहभाग घेतला होता. त्या सर्वांमध्ये अनंतने आपल्या मेहनती, जिद्दी व चिकाटीमुळे वेगळी छाप पाडली. अनंतची कराटे शिक्षिका श्रेयसी पवार यांनी या यशाबद्दल समाधान व्यक्त करताना सांगितले की, अनंतमध्ये कराटेबद्दल शिस्त, एकाग्रता व प्रबळ जिद्द आहे. एवढ्या लहान वयात त्याने केलेली ही कामगिरी खरंच अभिमानास्पद असून, भविष्यात तो आणखी मोठे यश मिळवेल.