मेट्रोच्या कामामुळे बसचा अपघात
नेतीवली परिसरातील घटना
कल्याण, ता. १८ (बातमीदार) : शहरात सध्या ठाणे-भिवंडी-कल्याण मेट्रो लाइन पाच आणि कल्याण-तळोजा मेट्रो लाइन १२ या दोन्ही प्रकल्पांची कामे सुरू आहेत. या कामांमुळे वाहतुकीत तात्पुरते बदल करण्यात आले आहेत. नेतीवली परिसरात रविवारी (ता. १७) रात्री अरुंद रस्त्यावरून जात असताना अंदाज न आल्याने एका परिवहनच्या बसचा अपघात झाला आहे. अंधार असल्याने बसचालकाला अंदाज आला नाही. ही बस मेट्रोने उभारलेल्या सुरक्षा भिंतीवर आदळली. या अपघातात चालक-वाहक थोडक्यात बचावल्याची माहिती प्रत्यक्षदर्शींनी दिली.

मेट्रोचे काम करताना हलगर्जी होत असल्याचा आरोप स्थानिक रहिवासी अंकुश इंगळे यांनी केला आहे. मेट्रोच्या कामामुळे रस्ता अरुंद झाला असून, या परिसरात वीज नाही, शिवाय धोका दर्शविणारे रेडियमदेखील लावलेले नसल्याने चालकांना रात्रीच्या अंधारात रस्त्याचा अंदाज लागत नाही. वारंवार तक्रारी करूनही प्रशासन दखल घेत नसल्याचेही इंगळे म्हणाले. मागील काही दिवसांपूर्वी मेट्रो पाचच्या कामादरम्यान रिक्षा प्रवाशाच्या डोक्यात सळई घुसल्याची घटना ताजी आहे. त्यामुळे कुणाचा जीव गेल्यानंतर खबरदारी बाळगणार का, असा सवाल या वेळी उपस्थित केला आहे.

रात्रीच्या वेळेस कामे
कल्याण शिळ रोडवर पत्रीपूल ते रूणवाल चौक, मानपाडा चौक ते सोनारपाडा चौक आणि सुयोग रिजन्सी अनंतम ते व्यंकटेश पेट्रोलपंपपर्यंत साधारणत: रात्रीच्या वेळेत कामे केली जात आहेत. ३१ ऑगस्टपर्यंत गर्डर ठेवण्याची कामे केली जाणार असल्याने अवजड आणि हलक्या वाहनांना ठरावीक ठिकाणी प्रवेश बंद केला आहे. आधीच कल्याण डोंबिवली परिसर वाहतूक कोंडीने त्रस्त असताना या मेट्रो कामामुळे इतर रस्त्यावरही जास्त कोंडी निर्माण होण्याची शक्यता वाढली आहे. तसेच काही परिसरात चिखल आणि अस्वच्छताही दिसून येत आहे.