नवी मुंबईकरांची दिंडी स्वरूपात माउलींची पालखीतून मिरवणूक
वाशी, ता. १८ (बातमीदार) ः संतश्रेष्ठ श्री ज्ञानेश्वर महाराज यांचे २०२५ हे वर्ष सप्तशतकोत्तर सुवर्णमहोत्सवी (७५०) जयंती वर्ष म्हणून साजरे करण्यात येत आहे. यानिमित्त मुख्यमंत्री यांच्या संकल्पनेनुसार नवी मुंबई महानगरपालिकेच्या वतीने आयुक्त डॉ. कैलास शिंदे यांच्या मार्गदर्शनाखाली ज्ञानेश्वर माउलींचा जयंती उत्सव साजरा करण्यात आला. याप्रसंगी सजवलेल्या पालखीत ठेवलेल्या श्री ज्ञानेश्वर माउलींच्या प्रतिमेचे व ज्ञानेश्वरी ग्रंथाचे पूजन करून महापालिका मुख्यालयातून दिंडी स्वरूपातील मिरवणुकीला प्रारंभ करण्यात आला.
संत ज्ञानेश्वरांच्या वेशभूषेतील विद्यार्थी सर्वांचे लक्ष वेधून घेत होता. टाळ-मृदगांच्या गजरात, लेझीम पथकासह मुख्यालयासमोरील सेवारस्त्याने निघालेल्या दिंडीमध्ये आबालवृद्ध नागरिक मोठ्या संख्येने सहभागी होते. विशेषत्वाने ज्ञानदीप सेवा मंडळाच्या प्राथमिक माध्यमिक विद्यालयाचे विद्यार्थी-विद्यार्थिनी, मुख्याध्यापक रत्नाकर तांडेल यांच्या मार्गदर्शनाखाली वारकरी वेशात लेझीम पथकासह दिंडीत सहभागी होते. युवक, युवतींचाही दिंडीत लक्षणीय सहभाग होता. पुंडलिका वरदे हरी विठ्ठल, ज्ञानोबा माउली तुकाराम, जय जय राम कृष्ण हरी या नामगजरासह दिंडीत सहभागी ज्ञानाई प्रासादिक भज मंडळ करावे यांचे भजनीबुवा पंढरीनाथ भोईर, विजय नाईक, रवींद्र भोईर तसेच नेरूळचे अमृतबुवा पाटील या वारकरी बुवांनी अभंगांचे गायन करीत दिंडीला भावस्वर प्रदान केला. विशेष म्हणजे रस्त्यामध्ये ठिकठिकाणी थांबून तसेच मुख्यालयाच्या प्रांगणात रिंगण घालत फुगड्या, झिम्मासारखे दिंडीतील खेळही खेळण्यात आले.