रुग्णालयातील अडचणी सोडवण्यासाठी अधीक्षकांची भेट
-दि म्युनिसिपल युनियन तोडगा काढणार
सकाळ वृत्तसेवा
मुंबई, ता. १८ : वांद्रे येथील के. बी. भाभा पालिका सर्वसाधारण रुग्णालयातील कामगारांमध्ये प्रलंबित प्रश्नांबाबत प्रशासनाची उदासीनता आणि वैद्यकीय अधीक्षकांच्या वर्तनामुळे तीव्र नाराजी पसरली आहे. याबाबत मंगळवारी सकाळी दि म्युनिसिपल युनियनचे शिष्टमंडळ अधीक्षक व खाते प्रमुखांची भेट घेऊन तोडगा काढण्याचा प्रयत्न करणार आहेत. कामगारांच्या प्रलंबित मागण्यांवर तातडीने तोडगा निघण्यासाठी ही बैठक बोलावण्यात आली आहे. त्यामुळे कामगारांना माेठा दिलासा मिळण्याची शक्यता निर्माण झाली आहे.
कामगारांनी सेवाज्येष्ठतेनुसार कामाचे वाटप, महिलांना साडीऐवजी ड्रेस उपलब्ध करून देणे, नवीन इमारतीच्या प्रत्येक मजल्यावर विश्रांतीगृह व चेंजिंग रूमची सोय, गणवेश व आवश्यक साहित्याचा वेळेत पुरवठा, उपहारगृहातील निकृष्ट दर्जाच्या पदार्थांची चौकशी, सेवापुस्तिकेची दुय्यम प्रत तसेच गोपनीय अहवालाची प्रतवारी अशा अनेक मागण्या मांडल्या. या मागण्या अनेक महिन्यांपासून प्रलंबित असून, वारंवार पाठपुरावा करूनही ठोस पावले न उचलल्याने कर्मचाऱ्यांमध्ये असंतोष वाढला आहे.
याशिवाय वैद्यकीय अधीक्षकांकडून कर्मचाऱ्यांना दुय्यम दर्जाची वागणूक, शिवीगाळ, अरेरावी आणि अवमानास्पद वर्तन होत असल्याचे गंभीर आरोपही कामगारांनी केले आहेत. त्यामुळे रुग्णालयात कामगारांमध्ये असंतोषाचे वातावरण निर्माण झाले आहे.

-तोडगा न निघाल्यास आंदोलनाचा इशारा
दरम्यान, या बैठकीत न्याय्य तोडगा निघाला नाही तर पुढील आंदोलनाचा मार्ग निश्चित केला जाईल आणि त्यामुळे जनतेला वैद्यकीय सेवेत अडथळा निर्माण झाल्यास त्याची जबाबदारी प्रशासनाचीच राहील, असा इशारा युनियनचे सरचिटणीस रमाकांत बने यांनी दिला.