कचऱ्याचा डोंगर, नागरिकांचा संताप
कोपरखैरणे व घणसोलीतील डम्पिंग ग्राउंडचा प्रश्न गंभीर
नवी मुंबई, ता. १८ (बातमीदार) ः कोपरखैरणे आणि घणसोली परिसरात कचरा व्यवस्थापनाचा प्रश्न दिवसेंदिवस गंभीर होत चालला आहे. शहरातील वाढत्या लोकसंख्येमुळे निर्माण होणारा टनवारी कचरा योग्य पद्धतीने उचलला जात नाही. परिणामी, अनेक ठिकाणी डम्पिंग ग्राउंडसारखी स्थिती निर्माण झाली असून, दुर्गंधी, माशा आणि डासांचा त्रास नागरिकांना सहन करावा लागत आहे.
विशेषत: घणसोली एमआयडीसीजवळ व कोपरखैरणेत कचऱ्याचे ढीग दिवसेंदिवस वाढत आहेत. यामुळे परिसरात दुर्गंधी पसरली असून, लहान मुलं आणि ज्येष्ठ नागरिकांना श्वसनासंबंधी त्रास होत आहे. यामुळे स्थानिकांमध्ये संतापाचे वातावरण आहे. महापालिका वारंवार आश्वासन देते, पण प्रत्यक्षात परिस्थितीत सुधारणा होत नाही, अशी प्रतिक्रिया स्थानिकांनी दिली.
महापालिकेने घरगुती कचऱ्याचे विभाजन, घनकचरा प्रक्रिया प्रकल्प यावर जोर द्यावा, अशी मागणी नागरिकांनी केली आहे, तर पर्यावरणप्रेमींनीही या प्रश्नाकडे गांभीर्याने लक्ष देण्याचे आवाहन केले आहे अन्यथा आरोग्यविषयक आजारांचा मोठा धोका निर्माण होऊ शकतो, असा इशाराही देण्यात आला आहे. कोपरखैरणे व घणसोलीसारख्या वेगाने विकसित होणाऱ्या भागात स्वच्छता ही मूलभूत गरज असताना कचऱ्याचा प्रश्न कायम राहणे, ही चिंतेची बाब असल्याचे मत व्यक्त होत आहे.