४९० पदांसाठी ५० हजारांहून अधिक अर्ज
कल्याण डोंबिवली पालिकेची भरती
सकाळ वृत्तसेवा
डोंबिवली, ता. १८ : कल्याण डोंबिवली महापालिकेच्या विविध विभागांमध्ये ४९० पदांसाठी भरती प्रक्रिया राबवण्यात येत असून, या भरतीसाठी ५० हजारांहून अधिक अर्ज ऑनलाइन पद्धतीने प्राप्त झाले आहेत. भरती प्रक्रियेसाठी उमेदवारांकडून मोठ्या प्रमाणात प्रतिसाद मिळाल्याने स्पर्धा अत्यंत तीव्र होणार आहे. या भरतीसाठी ९ ते १२ सप्टेंबर २०२५ दरम्यान परीक्षा घेण्यात येणार आहे. या परीक्षेचे आयोजन टाटा कन्सल्टन्सी सर्व्हिसेस या संस्थेमार्फत करण्यात येणार असून, ती संपूर्ण संगणक प्रणालीवर आधारित होण्याची शक्यता आहे. परीक्षेचे अचूक वेळापत्रक, परीक्षा केंद्रांची माहिती आणि प्रवेशपत्र महापालिकेच्या संकेतस्थळावर लवकरच प्रसिद्ध होणार आहे.
भरती प्रक्रियेची जाहिरात जून महिन्यात प्रसिद्ध करण्यात आली होती. सुरुवातीला अर्ज भरण्याची अंतिम तारीख ३ जुलै २०२५ होती, मात्र उमेदवारांच्या सोयीसाठी ती १५ जुलैपर्यंत वाढवण्यात आली. खुल्या गटासाठी परीक्षा शुल्क १.००० रुपये तर मागासवर्गीय उमेदवारांसाठी ९०० रुपये निश्चित करण्यात आले होते.
या भरतीअंतर्गत महापालिकेच्या २१ वेगवेगळ्या संवर्गांमधील पदे भरण्यात येणार आहेत. यामध्ये प्रशासकीय, लेखा, वैद्यकीय, अग्निशमन, अभियांत्रिकी, विधी, क्रीडा, उद्यान, घनकचरा व्यवस्थापन आणि भांडार विभाग यांचा समावेश आहे. या पदांमध्ये सर्वाधिक भरती अग्निशमन विभागातील अग्निशामक (१३८ पदे), लिपिक-टंकलेखक (११६ पदे), वैद्यकीय विभागातील परिचारिका (७८ पदे) आणि स्थापत्य विभागातील कनिष्ठ अभियंता (५८ पदे) अशा पदांवर होणार आहे.
अशी असेल वयोमर्यादा
परीक्षेसाठी आवश्यक विषयांमध्ये सामान्य ज्ञान, मराठी, इंग्रजी आणि बुद्धिमत्ता चाचणी यांचा समावेश आहे. पदानुसार स्वतंत्र अभ्यासक्रम आधीच जाहीर करण्यात आलेला आहे. या भरतीसाठी किमान वयोमर्यादा १८ वर्षे निश्चित करण्यात आली आहे. खुल्या गटासाठी कमाल वयोमर्यादा ३८ वर्षे आहे. मागासवर्गीय, अनाथ आणि प्रावीण्यप्राप्त खेळाडूंना ४३ वर्षांपर्यंत सवलत आहे. दिव्यांग, माजी सैनिक, प्रकल्पग्रस्त आणि भूकंपग्रस्त उमेदवारांसाठी वयोमर्यादा ४५ वर्षे आहे. स्वातंत्र्यसैनिकांचे पाल्य आणि माजी सैनिकांसाठीदेखील ४५ वर्षांची मर्यादा असून, माजी सैनिकांना त्यांच्या सेवेवर आधारित तीन वर्षांची अतिरिक्त सूट आहे. अंशकालीन उमेदवारांसाठी वयोमर्यादा ५५ वर्षे निश्चित करण्यात आली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.