सकाळ वृत्तसेवा
पालघर, ता. १८ : नगर परिषदेच्या आगामी निवडणुकीच्या पार्श्वभूमीवर सोमवारी (ता. १८) प्रभागरचना जाहीर करण्यात आली आहे. यापूर्वी पालघर नगर परिषदेत १४ प्रभागाअंतर्गत २८ नगरसेवक होते. आता यामध्ये एका प्रभागाची भर पडली असून, नगरसेवकांची संख्या ३० झाली आहे. या वेळी दोन सदस्य वाढले आहेत.

पालघर नगर परिषद क्षेत्राची एकूण लोकसंख्या २०२१ च्या आकडेवारीनुसार ६८ हजार ९३० आहे. त्यापैकी अनुसूचित जाती प्रवर्गाची संख्या ३,४१९, तर अनुसूचित जमातीची लोकसंख्या ९,७२० आहे. पालघर नगर परिषदेत प्रत्येक प्रभागात दोन सदस्य निश्चित आहेत. एका प्रभागाची सरासरी लोकसंख्या लक्षात घेता ४,५९५ सरासरी लोकसंख्या आहे. कमाल लोकसंख्या पाच हजार ५५, तर किमान लोकसंख्या चार हजार १३५ प्रशासनाने ग्राह्य धरली आहे. त्यानुसार प्रभागरचना करण्यात आली असून, यंदा नगरपरिषदेमध्ये एक प्रभाग वाढला आहे. नगर परिषदेची प्रभागरचना निवडणूक विभागाच्या मान्यतेने नगर परिषदेचे मुख्याधिकारी नानासाहेब कामोठे यांनी प्रसिद्ध केली आहे. या प्रभागरचनेवर कोणतेही आक्षेप सूचना किंवा हरकती नागरिकांना नोंदवायच्या असल्यास ३१ ऑगस्टपर्यंत नगर परिषद कार्यालयात त्या नोंदवण्याचे आवाहन कामोठे यांनी केले आहे.

प्रभागरचनेमध्ये चारही दिशेने प्रभागाच्या हद्दी निश्चिती करण्यात आल्या असून, यासंदर्भात सूचना व हरकती पालघर नगर परिषदेमार्फत मागवण्यात आल्या आहेत. सूचना व हरकतींवर विचार केल्यानंतर अंतिम प्रभागरचना व त्यानंतर निवडणूक विभागाच्या मार्गदर्शन सूचनेनुसार सदस्यांची आरक्षण सोडत काढली जाणार आहे.