पनवेलमध्ये जनजीवन सुरळीत
महापालिकेची आपत्कालीन यंत्रणा तैनात
पनवेल ता. १८ (बातमीदार)ः पनवेल शहर तसेच परिसरात २४ तासांत तब्बल ११६.१ मिमी पावसाची नोंद झाली. पावसाचा जोर वाढूनही पालिकेच्या दक्षतेमुळे पाणी साचण्याची परिस्थिती उद्भवली नाही. त्यामुळे पनवेल शहरातील जनजीवन सुरळीत होते.
शहरातील शिवाजी चौक, दांडेकर हॉस्पिटल, दि. बा. पाटील स्कूल परिसरात थोड्याफार प्रमाणात पाणी साचले होते, मात्र पालिका कर्मचाऱ्यांनी त्वरित पाण्याचा निचरा करून परिस्थिती नियंत्रणात आणली. पावसाच्या पार्श्वभूमीवर पालिकेचे आपत्कालीन पथक सज्ज ठेवण्यात आले होते. विविध भागात कर्मचारी तैनात करून परिस्थितीवर लक्ष ठेवले जात आहे. यंदा वसाहतीमध्ये पाणी भरण्याचे प्रकार झाले नसल्याने नागरिकांनी समाधान व्यक्त केले.
----------------------------------
नद्या इशारा पातळीखाली
पनवेलच्या ग्रामीण भागातही संततधार सुरू असून, पावसाचा भातपिकाला मोठा फायदा होत आहे. त्यामुळे शेतकरी समाधानी आहेत. परिसरातून वाहणाऱ्या गाढी, कसाडी व काळुंद्री नद्या दुथडी भरून वाहत असल्या तरी इशारा पातळीखाली आहेत.