बदलापूर पाइपलाइन मार्गाला नदीचे स्वरूप
सकाळ वृत्तसेवा
डोंबिवली, ता. १८ : कल्याण-डोंबिवलीसह अंबरनाथ, बदलापूर परिसरात पावसाचा जोर आहे. सोमवारी (ता. १८) दुपारपासून पावसाच्या जोरदार सरी कोसळू लागल्याने रस्त्यावर जागोजागी पाणी साचले. बदलापूर पाइपलाइन या महामार्गाची परिस्थिती पहिली असता रस्ता की नदी, असा प्रश्न वाहनचालकांना पडला. रस्त्यावरून पाण्याचा प्रवाह वेगाने वाहत असल्याने रस्त्याला नदीचे स्वरूप प्राप्त झाले होते. नेवाळी परिसरातील नागरिकांच्या घरात पाणी शिरले होते.
बदलापूर पाइपलाइन रोड हा वाहतुकीच्या दृष्टीने अत्यंत महत्त्वाचा महामार्ग आहे. मुंबई, ठाणे दिशेकडून उल्हासनगर, अंबरनाथ, बदलापूर परिसरात जाण्यासाठी हा एकमेव मार्ग आहे. अंबरनाथ एमआयडीसी परिसरात जाण्यासाठीदेखील याच मार्गाचा वापर केला जातो. या रस्त्याचे सिमेंट काँक्रीटीकरणाचे काम काही ठिकाणी सुरू आहे. त्यातच रस्त्याच्या दुतर्फा असलेल्या गटारांची सफाई केली नसल्याने पहिल्या पावसापासून या रस्त्यावर मोठ्या प्रमाणात पाणी साचत आहे. सोमवारी सकाळपासून या भागात पाऊस सुरू आहे. दुपारनंतर पावसाचा जोर वाढल्यानंतर पाणी साचून रस्त्यावर नदीचे स्वरूप प्राप्त झाले आहे. या पाण्यातून मार्ग काढताना वाहनचालकांना कसरत करावी लागत होती. पावसाचे पाणी वाहनाच्या इंजिनमध्ये गेल्याने अनेक वाहने बंद पडली.