रेल्वे वाहतुकीचे तीनतेरा!
५० हून अधिक लोकल रद्द; अनेक फेऱ्या विलंबाने
सकाळ वृत्तसेवा
मुंबई, ता. १८ : मुसळधार पावसाने सोमवारी सकाळी मुंबईला अक्षरशः ठप्प केले. सलग कोसळणाऱ्या पावसामुळे शहरातील अनेक सखल भागांप्रमाणेच रेल्वे रुळांवरही पाणी साचले. दादर, कुर्ला, टिळकनगर, मानखुर्द आणि गोवंडी स्थानकांवर पाणी साचल्याने मध्य व हार्बर मार्गावरील लोकल सेवा विस्कळित झाली. दिवसाभरात ५० हून अधिक लोकल फेऱ्या रद्द कराव्या लागल्या, तर २५० पेक्षा अधिक गाड्या उशिराने धावत होत्या.
आठवड्याच्या पहिल्याच दिवशी झालेल्या या गोंधळामुळे कार्यालयीन प्रवाशांची प्रचंड दमछाक झाली. सकाळीच रेल्वे गाड्यांचा वेग कमी झाल्याने स्थानकांत प्रवाशांची गर्दी उसळली. दुपारी दोन वाजेपर्यंत मध्य रेल्वेवरील तब्बल ३८ लोकल फेऱ्या रद्द करण्यात आल्या. दुपारनंतर पावसाचा जोर कमी झाला तरी उशिरा धावणाऱ्या गाड्यांमुळे प्रवाशांचे हाल झाले. सोमवारी सकाळी आठनंतर गोवंडी, टिळकनगर, कुर्ला, दादर आणि नाहूर रेल्वेस्थानकांवरील रुळांवर पाणी साचले. परिणामी मध्य रेल्वेच्या मुख्य मार्गावरील गाड्या ८ ते १० मिनिटे, तर हार्बर मार्गावरील गाड्या तब्बल १५ ते २० मिनिटे विलंबाने धावत होत्या. दुपारी १२ नंतर मुख्य मार्गावरील २० ते २५ मिनिटे आणि हार्बर मार्गावरील लोकल सेवा १५ ते २० मिनिटे उशिराने धावत होत्या.
दरम्यान, मध्य रेल्वेप्रमाणे पश्चिम रेल्वेची वाहतूकही पावसामुळे बिकट झाली. माटुंगा–माहीम स्थानकांदरम्यान पाणी साचल्याने या मार्गावरील गाड्याही २० ते २२ मिनिटे उशिराने धावत होत्या. दादर, माटुंगा आणि कुर्ला स्थानकांच्या रुळांवर पाणी शिरल्याने प्रवाशांचे हाल झाले.
---
दृश्यमानतेमुळे वेगावर मर्यादा
सततच्या पावसामुळे हवेतील दृश्यमानता कमी झाल्याने सुरक्षा लक्षात घेऊन कर्जत-कल्याण, कसारा-कल्याण आणि कल्याण-सीएसएमटीदरम्यान लोकल गाड्यांच्या वेगावर मर्यादा लागू करण्यात आल्याचे मध्य रेल्वेने सांगितले.
---
मेल-एक्स्प्रेस गाड्यांनाही फटका
 मुसळधार पावसाचा फटका केवळ लोकलपुरताच मर्यादित नव्हता, तर मुंबईकडे येणाऱ्या आणि मुंबईहून सुटणाऱ्या मेल-एक्स्प्रेस गाड्यांनाही बसला. रेल्वे रुळांवर पाणी साचल्याने मुंबईहून पुणे, नागपूर, सोलापूर, कोल्हापूर या दिशेने धावणाऱ्या गाड्या तब्बल अर्धा ते एक तास उशिराने सुटत होत्या. गुजरात आणि उत्तर भारतातून येणाऱ्या लांब  पल्ल्याच्या गाड्याही विलंबाने धावत होत्या. त्यामुळे प्रवाशांना स्थानकांवर बराच वेळ प्रतीक्षा करावी लागली.
---