डबेवाल्यांना आता हक्काच्या घरांची आस!
- मुख्यमंत्र्यांच्या घोषणेमुळे दिलासा

सकाळ वृत्तसेवा
मुंबई, ता. १८ : सव्वाशे वर्षांपासून इमानेइतबारे डबे पोहोचवण्याचे काम करणाऱ्या मुंबईच्या डबेवाल्यांना आता हक्काच्या घराची आस लागली आहे. नुकत्याच पार पडलेल्या ‘डबेवाला आंतरराष्ट्रीय अनुभव केंद्रा’च्या उद् घाटनप्रसंगी मुख्यमंत्री देवेंद्र फडणवीस यांनी डबेवाल्यांना २५ लाखांत ५०० चौरस फुटांचे घर देणार असल्याची घोषणा केली होती. त्यामुळे डबेवाल्यांमध्ये सकारात्मक उत्साह निर्माण झाला आहे. परिणामी अनेक वर्षांपासूनच्या घराच्या स्वप्नाला बळ मिळणार असल्याची भावना डबेवाल्यांकडून व्यक्त केली जात आहे.
डबेवाल्यांच्या व्यवसायाला मोठी परंपरा असून, मॅनेजमेंट गुरू अशीही त्यांची जगभरात ओळख आहे. त्यामुळे मुंबईत येणाऱ्यांना डबेवाल्यांच्या व्यवसायाबाबत माहिती मिळावी, त्याचा अभ्यास करता यावा म्हणून डबेवाला आंतरराष्ट्रीय अनुभव केंद्रासारखी वास्तू उभारण्याची मागणी होत होती. त्यानुसार सरकारच्या सहकार्याने हे अनुभव केंद्र उभारल्याने डबेवाल्यांकडून समाधान व्यक्त केले जात आहे.

कोट
मुख्यमंत्र्यांनी हक्काचे घर परवडणाऱ्या किमतीत देण्याची घोषणा केली आहे. आता आमचे अनेक वर्षांपासूनचे घराचे स्वप्न पूर्ण होणार आहे. आमच्यासाठी ठाणे येथील अंजन दिवागाव येथे पाच हजार घरे उभारली जाणार आहेत. त्यामुळे प्रत्येक डबेवाल्याला हक्काचे घर मिळू शकेल.
- उल्हास मुके, अध्यक्ष, मुंबई टिफीन बॉक्स सप्लायर चॅरिटी ट्रस्ट