पावसामुळे रस्ते वाहतूक कासवगतीने
सकाळ वृत्तसेवा
मुंबई, ता. १८ : मुसळधार पावसामुळे मुंबईतील अनेक भागात पाणी साचले. शहरांच्या विविध भागांना जोडणारे प्रमुख रस्ते आणि अंडरपास पाण्याखाली गेले. वांद्रे, सायन, गांधी मार्केट, भायखळा, दादर, अंधेरी, कुर्ला, चेंबूर भागांमध्ये पाणी साचल्याने अनेक भागात वाहतूक कोंडी झाली होती. पूर्व मुक्त मार्ग, पूर्व द्रुतगती मार्ग आणि पश्चिम द्रुतगती महामार्गावरील वाहतुकीचा वेगही पावसामुळे मंदावला होता.
पावसामुळे नेहमीच बंद पडणारा अंधेरी सबवे आजही दिवसभर वाहतुकीसाठी बंद ठेवण्यात आला होता. येथील वाहतूक ठाकरे पूल आणि गोखले पूलमार्गे वळवण्यात आल्याची माहिती मुंबई पोलिसांनी दिली. मुसळधार पावसामुळे पश्चिम द्रुतगती महामार्गावर मोठ्या प्रमाणात वाहतूक कोंडी झाली. रस्त्यांवर पाणी साचल्याने आणि वाहनांची गती मंदावल्याने प्रवासी अडकले होते. अंधेरी आणि लोखंडवालासह अनेक उपनगरांमध्ये सततच्या पावसामुळे रस्त्यांवर गुडघ्यापर्यंत पाणी साचले होते.