भांडणात मध्यस्थी करणे पडले महिलेला महागात
सकाळ वृत्तसेवा
ठाणे, ता. १८ : दोन शेजाऱ्यांच्या भांडणामध्ये मध्यस्थी करणे तिसऱ्या महिलेला चांगलेच महागात पडले आहे. मध्यस्थी करणारी महिला श्वानदंशाने जखमी असून, याप्रकरणी तिने श्वान अंगावर सोडणाऱ्या शेजारच्या महिलेविरोधात तक्रार दिली आहे. त्यानुसार गुन्हा दाखल झाला असून, ही घटना वर्तकनगर परिसरात घडली.
पीडित महिला वर्तकनगर परिसरात राहत असून, तिने दिलेल्या तक्रारीत श्वान बाहेर सोडण्यावरून बाचाबाची सुरू होती, असे म्हटले आहे. हा प्रकार सायंकाळपर्यंत सुरूच होता, म्हणून तक्रारदार महिलेने एका शेजारणीला समजावून घरी नेले. याचदरम्यान श्वान असलेल्या दुसऱ्या शेजारणीने तक्रारदार महिलेला शिवीगाळ केली. त्यानंतर समजावण्यासाठी शेजारणीच्या घरी गेल्यावर घरातील चार-पाच श्वानांपैकी एका श्वानाला तिच्या अंगावर सोडून दिले. तो श्वान उजव्या हाताला चावला. श्वानाचा एक दात लागल्याने दुखापत झाल्याचे तक्रारीत नमूद करण्यात आले आहे. याप्रकरणी दिलेल्या तक्रारीनुसार गुन्हा दाखल करण्यात आल्याची माहिती वर्तकनगर पोलिसांनी दिली. पुढील तपास वरिष्ठ पोलिस निरीक्षक राजकुमार वाघचौरे यांच्या मार्गदर्शनाखाली सुरू आहे.