अंबरनाथ, ता. १८ (वार्ताहर) : पश्चिमेतील कल्याण-कर्जत रोडवरील डी मार्टसमोर शनिवारी उशिरा रात्री झालेल्या भीषण अपघातात १९ वर्षीय तरुण गंभीर जखमी झाला. दीपक मंडराई असे जखमीचे नाव आहे. अपघातानंतर दुचाकी चालक फरार झाला आहे. याप्रकरणी रामविलास मंडराई (वय ४३) यांनी तक्रार दाखल केली आहे.
रामविलास मंडराई यांचा मुलगा दीपक हा शनिवारी (ता. १६) रात्री साडेअकराच्या सुमारास डी मार्टमधून काम आटोपून घरी जात होता. रस्ता ओलांडत असताना उल्हासनगरकडून अंबरनाथकडे भरधाव वेगात आणि वाहतुकीच्या नियमांकडे दुर्लक्ष करून दुचाकीचालकाने त्याला धडक दिली. अपघातात दीपकच्या चेहऱ्यावर व डोक्यावर गंभीर दुखापती झाल्या आहेत. उपचारासाठी त्याला तातडीने रुग्णालयात हलवण्यात आले. अपघातानंतर दुचाकीस्वार फरार झाला असून त्याची ओळख अद्याप पटलेली नाही. याप्रकरणी अंबरनाथ पोलिस ठाण्यात गुन्हा दाखल करण्यात आला आहे.