पोलिस उपनिरीक्षकाला
लाच घेताना अटक
भाईंदर, ता. १८ (बातमीदार) : काशीगाव पोलिस ठाण्यात कार्यरत असलेले उपनिरीक्षक भगवान पालवे यांना १५ हजार रुपयांची लाच घेताना लाचलुचपत प्रतिबंधक विभागाने सोमवारी (ता. १८) सायंकाळी अटक केली.
काशीगाव पोलिस ठाण्यात दाखल असलेल्या गुन्ह्यात एका व्यक्तीला अटक न करण्यासाठी तसेच गुन्ह्यात मदत करण्यासाठी पालवे यांनी त्या व्यक्तीच्या भावाकडे १५ हजार रुपयांची मागणी केली. याप्रकरणी व्यक्तीच्या भावाने ठाणे लाचलुचपत प्रतिबंधक विभागाकडे तक्रार दाखल केली. या तक्रारीची पडताळणी केल्यानंतर लाचलुचपत प्रतिबंधक विभागाने सापळा रचला आणि पालवे यांना पोलिस ठाण्यातच लाच घेताना पकडण्यात आले.