टोल माफी पासेसचे वितरण सुरू
नागरिकांचा पहिल्याच दिवशी चांगला प्रतिसाद
ठाणे शहर, ता. २२ (बातमीदार) : गणेशोत्सवासाठी कोकणात जाणाऱ्या गणेशभक्तांना टोल माफीची सुविधा उपलब्ध करून देण्यात आली आहे. ठाणे शहरात, वाहतूक विभाग आणि प्रादेशिक परिवहन विभागाकडून टोल माफीचे पासेस वितरित करण्यास सुरुवात झाली आहे. या सुविधेचा लाभ घेण्यासाठी नागरिकांनी मोठ्या प्रमाणात प्रतिसाद दिला आहे.
हे पासेस २३ ऑगस्ट ते ९ सप्टेंबर या कालावधीत लागू असतील. या वेळेत कोकणात जाताना आणि येताना दोन्ही वेळा टोल माफ राहणार आहे. मुंबई-बेंगळूर (क्रमांक ४८) आणि मुंबई-गोवा (क्रमांक ६६) या राष्ट्रीय महामार्गांवर तसेच सार्वजनिक बांधकाम विभाग आणि महाराष्ट्र राज्य रस्ते विकास महामंडळाच्या अखत्यारीतील इतर रस्त्यांवर हे पासेस चालतील. गुरुवारी (ता. २१) जारी केलेल्या परिपत्रकाला ठाणेकरांनी प्रतिसाद द्यायला सुरूवात झाली आहे.
टोल माफी पास मिळवण्यासाठी वाहनधारकांनी त्यांची वाहने ज्या विभागामध्ये नोंदणी केलेली आहेत, त्या विभागाच्या प्रादेशिक परिवहन कार्यालय, वाहतूक विभाग किंवा पोलिस ठाण्यामध्ये अर्ज करू शकता. अर्जासोबत वाहनाचे नोंदणी कार्ड (आरसी बुक), वाहन मालकाचे नाव आणि मोबाईल क्रमांक आवश्यक आहे.
या पासेसवर ‘गणेशोत्सव २०२५’, ‘कोकण दर्शन’ असे स्टिकर्स लावण्यात येणार आहेत. तसेच, त्यावर गाडीचा क्रमांक आणि चालकाचे नाव नमूद असेल. उपप्रादेशिक परिवहन अधिकारी रोहित काटकर आणि वाहतूक विभागाचे उपायुक्त पंकज शिरसाट यांनी नागरिकांना या सुविधेचा लाभ घेण्याचे आवाहन केले आहे.