‘खालिद का शिवाजी’बाबत हस्तक्षेपास नकार
न्यायालयाचे ‘सेन्सॉर’ला बाजू ऐकण्याचे आदेश

सकाळ वृत्तसेवा
मुंबई, ता. २२ ः वादाच्या भोवऱ्यात सापडलेल्या ‘खालिद का शिवाजी’ या चित्रपटाचा वाद उच्च न्यायालयात पोहोचला आहे. न्यायालयाने प्रदर्शनाच्या स्थगितीच्या निर्णयात तूर्तास हस्तक्षेप करण्यास नकार दिला. स्थगितीला मुदतवाढ देण्यापूर्वी याचिकाकर्ते आणि चित्रपट निर्मात्यांना सुनावणी देण्याचे आदेश न्यायालयाने सेन्सॉर मंडळाला दिले.
‘खालिद का शिवाजी’च्या प्रदर्शनाला दिलेल्या स्थगितीच्या निर्णयाला चित्रपटाचे दिग्दर्शक राज प्रीतम मोरे यांनी उच्च न्यायालयात धाव घेतली आहे. चुकीच्या तक्रारींच्या आधारे आपल्याला नोटीस पाठवण्यास आली आणि बाजू न ऐकताच चित्रपटाच्या प्रदर्शनाला स्थगिती दिल्याचा दावाही केला आहे. ही स्थगिती सार्वजनिक भावना आणि अस्पष्ट दाव्यांच्या आधारे दिल्याचेही याचिकेत म्हटले आहे. न्या. रेवती मोहिते-डेरे आणि न्या. डॉ. नीला गोखले खंडपीठापुढे सुनावणी झाली. तेव्हा न्यायालयाने सरकारच्या निर्णयात हस्तक्षेप करण्यास नकार देऊन चित्रपटाचे प्रदर्शन पुढील आदेशापर्यंत स्थगित राहील, असेही स्पष्ट केले.
...
स्थगिती तूर्तास कायम
चित्रपटात छत्रपती शिवाजी महाराजांबद्दलचे चुकीचे ऐतिहासिक संदर्भ दिल्याचा दावा करून माहिती आणि प्रसारण मंत्रालयाने २० ऑगस्टला चित्रपटाचे प्रदर्शन स्थगित करण्याच्या निर्णयाचे समर्थन केले. चित्रपटाच्या प्रदर्शनाला स्थगिती देण्यापूर्वी याचिकाकर्त्यांचे म्हणणे ऐकून घेण्यात आले असून स्थगितीचा निर्णय देताना याचिकाकर्त्यांचे म्हणणे ऐकून घेतले जाईल, असे सीबीएफसीच्या वतीने न्यायालयाला सांगण्यात आले. त्यानंतर न्यायालयाने सुनावणी तहकूब केली.
...
राज्य सरकारकडूनच प्रदर्शनाला स्थगिती
या चित्रपटासंदर्भात निर्णय देताना इतिहासाची मोडतोड सहन करणार नाही, असे सांस्कृतिक कार्यमंत्री आशीष शेलार यांनी स्पष्ट केले. या चित्रपटामुळे राज्यात कायदा-सुव्यवस्थेचा प्रश्न निर्माण होऊ नये, म्हणून राज्य सरकारनेच केंद्रीय माहिती आणि प्रसारण मंत्रालयाला पत्र लिहून चित्रपटाचे सेन्सॉर प्रमाणपत्र रद्द करण्याचे आणि प्रदर्शनच रोखण्यास सांगितल्याचे शेलार यांनी सांगितले.
...
वादास कारण काय?
‘खालिद का शिवाजी’ या चित्रपटाच्या शीर्षकावरूनच वादाला सुरुवात झाली. शिवाजी खालिदचा कसा असू शकतो, हा महत्त्वाचा मुद्दा असून त्यानंतर ट्रेलरमध्ये ऐकू येणाऱ्या संवादांमध्ये शिवाजी महाराजांच्या सैन्यात ३५ टक्के मुस्लिम सैनिक होते, त्यांचे ११ अंगरक्षक मुस्लिम होते, अशी माहिती देण्यात आली आहे. तसेच रायगडावर शिवाजी महाराजांनी मशीद बांधल्याचाही उल्लेख ट्रेलरमध्ये आहे. या तीन गोष्टींवर हिंदुत्ववादी संघटनांनी आक्षेप घेत चुकीचा इतिहास पसरवत असल्यामुळे चित्रपटावर बंदी आणण्याची मागणी केली.