भिसेगाव चर्च रोड परिसर नागरी सुविधापासून वंचित
कर्जत, ता. २८ (बातमीदार) : कर्जत नगरपरिषद हद्दीतील कर्जत रेल्वे स्थानकाजवळील चर्च रोड परिसर अनेक मूलभूत सोयी-सुविधांपासून वंचित राहिला आहे. शहरात कोट्यवधी रुपयांची विकासकामे सुरू असतानाही, या परिसरातील नागरिकांना दररोज असुविधा आणि अस्वच्छतेचा सामना करावा लागत आहे. अर्धवट गटारे, कचऱ्याचे ढिगारे, भिकाऱ्यांचा ठिय्या, पथदिव्यांची अपुरी सोय आणि अवैध वाहनतळ यामुळे परिसराची अवस्था दयनीय झाली आहे.
स्थानिक नागरिकांच्या मते, गटारे अनेक ठिकाणी उघडी असून त्यामध्ये कचरा साचतो. त्यामुळे दुर्गंधी पसरते आणि डासांचे प्रमाण वाढते. स्वच्छता विभागाला तक्रारी करूनही तात्पुरती स्वच्छता होते, मात्र कायमस्वरूपी उपाययोजना होत नाहीत. स्थानकाच्या जवळ असल्यामुळे प्रवासी वर्ग येथे वाहने बेकायदा उभी करतात. त्यामुळे दोन मोठी वाहने जाण्यासारखा रस्ता असूनही वाहतूक कोंडी आणि अडथळे निर्माण होतात. याशिवाय, परिसरातील रिक्त इमारतीखाली भिकाऱ्यांचा ठिय्या झाल्याने मद्यपींचा वावर, शिवीगाळ, भांडणे अशा प्रकारच्या घटना वाढल्या आहेत. दिवसरात्र सुरू असलेल्या या गोंधळामुळे नागरिक त्रस्त झाले आहेत. महिलांना आणि शालेय विद्यार्थ्यांना सुरक्षिततेचा प्रश्न निर्माण झाला आहे. पावसाळ्यात रस्त्यावर शेवाळ साचून पाय घसरून अपघात होण्याच्या घटना घडल्या आहेत.
.......................
या सर्व समस्यांबाबत रहिवाशांनी १५ ऑगस्ट रोजी नगरपरिषद मुख्याधिकारी तानाजी चव्हाण यांच्याकडे लेखी तक्रार केली होती. मात्र, आजपर्यंत कोणतीही ठोस कारवाई झालेली नाही. गणेशोत्सवाच्या दिवसात एखादी मोठी दुर्घटना घडल्याशिवाय पालिका प्रशासन जागे होईल का, असा सवाल नागरिक उपस्थित करत आहेत. अर्धवट गटारे, प्रकाशयोजनेचा अभाव, अस्वच्छता, अवैध पार्किंग आणि वाढता भिकारी त्रास यामुळे चर्च रोड परिसरातील नागरिकांचा संयम सुटू लागला आहे.