गणेशोत्सवानिमित्त एनएमएमटीची विशेष बससेवा
तुर्भे, ता. २८ (बातमीदार) : गणेशोत्सवानिमित्त नवी मुंबई महापालिका परिवहन उपक्रम (एनएमएमटी)मार्फत विशेष बससेवा दिली जाणार आहे. एनएमएमटीचे मुख्य वाहतूक अधिकारी सुनील साळुंखे यांनी याबाबत माहिती दिली. मुंबईतील मोठमोठ्या गणेशमूर्ती आणि आकर्षक देखावे पाहण्यासाठी अनेक भक्त नवी मुंबईतून मुंबईकडे प्रवास करतात. भक्तांच्या सोयीसाठी २७ ऑगस्ट ते ५ सप्टेंबर या कालावधीत नवी मुंबईतील घणसोली, घरोंदा व सीबीडी बसस्थानकातून मुंबईतील दादर व हिंदमाता परिसरासाठी रात्री आठ वाजल्यापासून पहाटे साडेतीन वाजेपर्यंत दर दीड तासांनी विशेष बससेवा उपलब्ध केली जाणार आहे. गणेशोत्सवाच्या काळात मुंबईत मोठ्या संख्येने भक्त गर्दी करतात. त्यामुळे प्रवास सुरक्षित आणि सोयीस्कर होण्यासाठी या विशेष बससेवेला प्राधान्य देण्यात आले आहे. त्‍यामुळे वेळापत्रकानुसार बससेवा वापरून त्यांनी गणेशोत्सवाच्या ठिकाणी सहजपणे पोहोचावे आणि आनंदाने सण साजरा करावा, असे आवाहन एनएमएमटीच्या अधिकाऱ्यांनी केले आहे. या विशेष बससेवेचा लाभ घेऊन भक्त मुंबईतील प्रमुख गणेश मंडळांची पूजा, दर्शन आणि उत्सव अनुभवू शकतात. दरवर्षी प्रमाणापेक्षा जास्त गर्दी होणे आणि वाहतूक कोंडी यामुळे अनेक भक्तांना त्रास सहन करावा लागतो. त्यामुळे या उपक्रमामुळे प्रवास अधिक सोयीस्कर होईल, असेही प्रशासनाचे म्हणणे आहे.
...............
विशेष बससेवेचे वेळापत्रक
सीबीडी बसस्थानक ते हिंदमाता/दादर : पहिली बस रात्री ८.२५, शेवटची बस रात्री १.४०
हिंदमाता/दादर ते सीबीडी : पहिली बस रात्री १०, शेवटची बस रात्री ३.१०
घणसोली/घरोंदा ते हिंदमाता/दादर : पहिली बस रात्री ९, शेवटची बस रात्री २.२५
हिंदमाता/दादर ते घणसोली/घरोंदा : पहिली बस रात्री १०.३०, शेवटची बस रात्री ३.५०