विद्यापीठातील नव्या वसतिगृहाची दरेकर समितीकडून पाहणी
मुंबई, ता. १ : मुंबई विद्यापीठाच्या कलिना येथील न्यू गर्ल्स वसतिगृहाची आमदार प्रवीण दरेकर यांच्या अध्यक्षतेखालील विधिमंडळाच्या समितीने पाहणी करून तेथील सोयी-सुविधांबाबत विद्यार्थिनींशी समितीने संवाद साधला.
विधिमंडळ अधिवेशनात या वसतिगृहातील सोयीसुविधांबाबत प्रश्न आल्यानंतर उच्चशिक्षणमंत्र्यांनी आमदारांची समिती गठित करण्याचे आश्वासन दिले होते. त्यानुसार नेमलेल्या दोन्ही सभागृहांच्या सहा सदस्यांच्या समितीने वसतिगृहाची पाहणी केली. या वेळी अनिल परब, निरंजन डावखरे, मनीषा कायंदे यांसह मुंबई विद्यापीठाचे कुलगुरू डॉ. रवींद्र कुलकर्णी उपस्थित होते.
या भेटीत विद्यापीठाचे कॅन्टीन, किचन, पाण्याची व्यवस्था आणि परिसराची पाहणी केली. वसतिगृहातील मुलींच्या खोल्यांवर जाऊन त्यांच्याशी संवाद साधला आणि त्यांच्या सुरक्षिततेची माहिती जाणून घेतली. या वेळी वसतिगृहाच्या परिसरात सीसीटीव्ही लावण्याचे निर्देश समितीने दिले. पाण्याच्या समस्येबाबत मुंबई महापालिका आयुक्तांशी बैठक घेऊन प्रश्न मार्गी लावू, असेही दरेकर यांनी आश्वस्त केले.
येत्या दोन दिवसांत मादाम कामा रोड आणि जगन्नाथ शंकरशेठ रोड येथील वसतिगृहांचीदेखील समिती पाहणी करून त्यानंतर समिती आपला अहवाल विधिमंडळाला येत्या अधिवेशनात सादर करेल, अशी माहिती दरेकर यांनी दिली.