आदिवासी कामगारांवर अन्यायाविरोधात भूमिसेना आक्रमक
शिष्टमंडळाची कंपनीत व्यवस्थापनासोबत यशस्वी चर्चा
मनोर, ता. २८ ः मनोर-पालघर रस्त्यावरील कविता रिबन अ‍ॅण्ड टेक्सटाईल कंपनीतील आदिवासी कामगारांवरील अन्यायाविरोधात शनिवारी (ता. २८) भूमिसेना आदिवासी एकता परिषद आक्रमक झाली आहे. या परिषदेच्या शिष्टमंडळाने कंपनी व्यवस्थापनासोबत चर्चा करून कामगारांच्या मागण्या मान्य करून घेतल्या आहेत.
कविता रिबन अ‍ॅड टेक्सटाईल कंपनीमध्ये काम करत असताना परप्रांतीय कामगाराने तीन स्थानिक आदिवासी कामगारांना अपमानास्पद वागणूक दिल्याने त्यांनी कारवाईची मागणी केली होती. उलट, कंपनी व्यवस्थापनाने या तीन कामगारांना कामावरून कमी केले होते. याविरोधात भूमिसेना आदिवासी एकता परिषदने आक्रमक भूमिका घेत आंदोलनाचा इशारा दिला आहे.
यासोबत अर्धा दिवस सुट्टी घेतल्यास गैरहजर दाखवण्याची पद्धत बंद करावी, समान वेतन, कँटिनची सुविधा, जेवणची वेळ वाढवणे, अपमानास्पद वागणूक थांबवण्याची मागणी कंपनी व्यवस्थापनाकडे करण्यात आली होती. या मागण्यांसाठी शिष्टमंडळाने कंपनी व्यवस्थापनासोबत चर्चा केली आहे.

मागण्या मान्य
दरम्यान, या तिन्ही कामगारांना काम मिळेपर्यंत कंपनी व्यवस्थापनाकडून वेतन देण्याचे आश्वासन समीर पाटील यांनी आदिवासी एकता परिषदेच्या शिष्टमंडळाला दिले. तसेच, इतर मागण्या मान्य केल्याचे जाहीर केले.