किमान वेतनसाठी उद्यान विभागातील कामगारांचे आंदोलन
तुर्भे, ता. १(बातमीदार ) ः नवी मुंबई महापालिकेतील उद्यान विभागात कार्यरत असणाऱ्या कामगारांना किमान वेतन दिले जात नसल्यामुळे समाज समता कामगार संघाच्या नेतृत्वाखाली उद्यान विभागातील कामगारांनी आंदोलन सुरू केले आहे.
नवी मुंबई महापालिकेच्या बेलापूर ते दिघा विभाग कार्यालय क्षेत्रात एकूण १७,००,५०३ चौरस मीटर क्षेत्रफळात उद्यान विकसित करण्यात आलेले आहे. या उद्यानात कार्यरत कामगारांना किमान वेतन आणि लेव्हीचे सर्व फायदे देणे बंधनकारक आहे, मात्र साधारण ४० कामगारांना किमान वेतन दिले जात नसल्याचे सांगण्यात येत आहे. याबाबत वारंवार पत्रव्यवहार करण्यात आला होता, परंतु याकडे दुर्लक्ष केले जात होते. महापालिकेच्या धोरणाप्रमाणे २,२०० चौरस मीटरसाठी एक कामगार याप्रमाणे १७,००,६०३ क्षेत्रफळासाठी ७७३ कामगार कार्यरत असणे आवश्यक आहे. प्रत्यक्षात मात्र उद्यान विभागात साडेचारशे कामगार कार्यरत आहेत. उर्वरित २०० कामगारांच्या वेतनाचे पैसे अधिकारी आणि ठेकेदार दरमहा वाटून घेत असल्याचा आरोप कामगारांकडून केला जात आहे. विशेष म्‍हणजे जे कामगार कामाला आहेत, त्यांनाही किमान वेतन देण्यास टाळाटाळ केली जात आहे. वारंवार पत्रव्यवहर करूनही कामगारांना किमान वेतन मिळत नसल्यामुळे कामगारांनी आमरण उपोषणाचा निर्णय घेतला आहे. या उपोषणात अनेक ज्‍येष्ठ कामगार आहेत. त्‍यातील अनेकांना वयानुसार अनेक व्‍याधी आहेत. त्यामुळे त्यांची तब्येत कधीही खालावण्याची शक्यता नाकारता येत नाही.