उल्हासनगरमध्ये गरब्यात गुंडाची दहशत
शाखाप्रमुखावर बंदूक रोखली, हवेत गोळीबार
उल्हासनगर, ता. १ (वार्ताहर) : उल्हासनगर कॅम्प क्र. २ मधील बंजारा विकास परिषद येथे नवरात्री गरबा सुरू असताना, सोहम पवार नावाच्या सराईत गुन्हेगाराने शिवसेना शाखाप्रमुख बाळा भगुरे यांच्यावर बंदूक रोखून दहशत निर्माण केली आणि नंतर हवेत दोन गोळ्या झाडल्या.
मंगळवारी (ता. ३०) रात्री पावणेबारा वाजता ही घटना घडली.
आयोजक बाळा भगुरे यांना उद्देशून सोहम पवारने ‘‘मी इकडचा भाई आहे, गरब्याला माझ्याकडून परवानगी घेतली का?’’ असे म्हणत दादागिरी केली आणि त्यांच्या दिशेने बंदूक रोखली. बाळा भगुरे यांच्या भावाने मध्यस्थी केल्याने त्यांचे प्राण वाचले; मात्र संतप्त झालेल्या गुंडाने दहशत निर्माण करण्यासाठी हवेत गोळीबार केला, ज्यामुळे गरब्याच्या ठिकाणी मोठी खळबळ उडाली आणि भीतीचे सावट पसरले.
घटनेची माहिती मिळताच उल्हासनगर पोलिसांनी तातडीने घटनास्थळी धाव घेतली. बाळा भगुरे यांच्या तक्रारीवरून आरोपी सोहम पवारविरुद्ध गुन्हा दाखल करण्यात आला असून, त्याला पकडण्यासाठी पोलिसांची विशेष टीम रवाना झाली आहे. या प्रकारामुळे सांस्कृतिक उत्सवात गुंडांच्या दहशतीमुळे शहराच्या कायदा व सुव्यवस्थेवर प्रश्नचिन्ह निर्माण झाले आहे.