विजय कुमार मध्य रेल्वेचे नवे महाव्यवस्थापक

सकाळ वृत्तसेवा
मुंबई, ता. १ : विजय कुमार यांनी बुधवारपासून मध्य रेल्वेच्या महाव्यवस्थापकपदाची सूत्रे हाती घेतली. धर्मवीर मीना यांच्या निवृत्तीनंतर त्यांनी ही जबाबदारी स्वीकारली. भारतीय रेल्वे यांत्रिक अभियांत्रिकी सेवा (आयआरएसएमई) १९८८ बॅचचे अधिकारी असलेल्या विजय कुमार यांनी यापूर्वी चित्तरंजन लोकोमोटिव्ह वर्क्सचे महाव्यवस्थापक म्हणून काम पाहिले. त्यांच्या नेतृत्वाखाली २०२४-२५ मध्ये तब्बल ७०० लोकोमोटिव्हचे उत्पादन होऊन विक्रम प्रस्थापित झाला.
चालू वर्षातील ७७७ लोकोमोटिव्हच्या लक्ष्यातील ४१७ लोकोमोटिव्ह सहा महिन्यांतच तयार करण्यात ‘सीएलडब्ल्यू’ला यश आले. विजय कुमार यांच्या ३५ वर्षांच्या प्रदीर्घ सेवेत त्यांनी उत्तर-पश्चिम रेल्वे, उत्तर रेल्वे, रेल्वे बोर्ड, आरडीएसओ आणि नॅशनल हाई स्पीड रेल कॉर्पोरेशनमध्ये महत्त्वाची जबाबदारी सांभाळली आहे. रेल्वेमंत्र्यांकडून त्यांना तीन वेळा, तर रेल्वे बोर्डाकडून विविध सन्मान मिळाले आहेत. त्यांच्या कारकिर्दीत टाल्गो ट्रेनची गती चाचणी, ॲल्युमिनियम कोच तंत्रज्ञान, तसेच हाय-स्पीड प्रकल्पांमध्ये मोलाची भूमिका त्यांनी निभावली. पंजाब इंजिनिअरिंग कॉलेज, चंडीगड येथून यांत्रिक अभियांत्रिकीचे शिक्षण घेतलेल्या विजय कुमार यांनी सिंगापूर, मलेशिया आणि भारतीय बिझनेस स्कूल, हैदराबाद येथे प्रगत व्यवस्थापनाचे प्रशिक्षण पूर्ण केले आहे. रेल्वेसंदर्भात त्यांनी २० पेक्षा जास्त देशांचा अभ्यास दौरा केला आहे.