तिसगावात भोंडल्याचा जल्लोष; पारंपरिक गाण्यांनी दुमदुमला परिसर
कल्याण, ता. ७ (बातमीदार): कोजागरी पौर्णिमेनिमित्त तिसगाव येथे पारंपरिक भोंडला सोहळा मोठ्या उत्साहात साजरा करण्यात आला. श्री नवनाथ जोगी सोसायटी आणि ट्रस्टी मंडळ यांच्या वतीने गोरक्षनाथ मंदिर परिसरात झालेल्या या कार्यक्रमात महिलांनी पारंपरिक गीतांवर नृत्य करत, भोंडल्याच्या गाण्यांत रंग भरला. पारंपरिक वेशभूषा, ढोलकीच्या तालावर नाचणाऱ्या महिलांमुळे परिसरात उत्सवी वातावरण निर्माण झाले. या उपक्रमात महिलांनी मोठ्या संख्येने सहभाग नोंदवत एकोप्याचे आणि संस्कृती जपण्याचे उत्तम उदाहरण ठेवले. महिलांच्या कलागुणांना वाव देणाऱ्या या उपक्रमाचे उपस्थित मान्यवरांनीही कौतुक केले. भोंडल्याच्या निमित्ताने समाजात स्नेह, संवाद आणि सौहार्द निर्माण होते, असे मत अनेकांनी व्यक्त केले. या सोहळ्याचे यश आयोजक समिती, कार्यकर्त्या आणि सहभागी महिलांच्या सहकार्यामुळेच शक्य झाले. कार्यक्रमात स्थानिक आमदार सुलभा गायकवाड यांनीही सहभाग घेतला होता. त्यांनी महिलांच्या सशक्तीकरणासाठी अशा सांस्कृतिक कार्यक्रमांचे महत्त्व अधोरेखित केले. या उपक्रमातून तिसगावचे सांस्कृतिक वैभव आणि परंपरा जपण्याचा प्रयत्न पुन्हा एकदा दिसून आला. आयोजकांनी सर्व सहभागी महिलांचे आभार मानत, हा वारसा पुढे नेण्याचे आवाहन केले.
...................................
‘मराठी मनाचा कॅनव्हास’ कार्यक्रमाचा ६० वा प्रयोग
डोंबिवली, ता. ७ (बातमीदार गायत्री ठाकूर) : मराठी भाषेला अभिजात दर्जा मिळून एक वर्ष पूर्ण झाल्याच्या निमित्ताने आणि कोजागरी पौर्णिमेच्या पूर्वसंध्येला ‘मराठी मनाचा कॅनव्हास’ या सांस्कृतिक कार्यक्रमाचा ६० वा प्रयोग मोठ्या उत्साहात पार पडला. काटदरे सभागृह, कुळगाव-बदलापूर येथे झालेल्या या कार्यक्रमात रसिक प्रेक्षकांनी भरभरून प्रतिसाद दिला. डॉ. मेघा विश्वास यांच्या संकल्पनेतून साकारलेल्या या कार्यक्रमात मराठी भाषेची विविध सांस्कृतिक रूपे, अभिवाचन, गीत, संगीत, नृत्य यांच्या माध्यमातून रसिकांसमोर मांडली गेली. कार्यक्रमाचे दिग्दर्शन, निर्मिती आणि संकल्पना डॉ. मेघा विश्वास यांची होती. रूपेश गांधी, मानसी गर्गे, समीर सुमन, अंशुमान गद्रे, शशांक पडवळ, वरुण देवरे यांच्या सादरीकरणाने कार्यक्रमात रंग भरले. ‘स्वयम् एक्सप्लोरर सेल्फ’ निर्मित आणि ‘राहुल साउंड अ‍ॅन्ड लाइट्स’ यांच्या सहकार्याने कार्यक्रम सादर करण्यात आला. मराठीच्या अभिजाततेचा गौरव करत, हा कार्यक्रम प्रेक्षकांच्या मनात दीर्घकाळ रेंगाळणारा ठरला. कार्यक्रमानंतर उपस्थित रसिकांनी आयोजकांचे आभार मानले आणि अशा कार्यक्रमांची अधिक गरज असल्याचे मत व्यक्त केले.
....................................
डोंबिवलीत ‘महाराष्ट्र गौरव पुरस्कार’ सोहळा
डोंबिवली, ता. ७ (बातमीदार): इंडियन कॉपीराईट प्रोटेक्शन व सहकर्म सामाजिक कल्याण फाउंडेशन यांच्या वतीने डोंबिवलीत भव्य राज्यस्तरीय ‘महाराष्ट्र गौरव पुरस्कार’ सोहळा थाटामाटात पार पडला. या सोहळ्यात १३८ समाजसेवक, उद्योजक, कलाकार यांचा गौरव करण्यात आला. कार्यक्रमात भारतीय लष्कराचे सुभेदार कॅप्टन महेंद्र गवई, एडिशनल कमिशनर साळुंखे, समाजसेविका शकुंतला तायडे, उद्योजिका सुमित्रा पाटील, अभिनेत्री साक्षी नाईक आदी मान्यवर उपस्थित होते. त्यांच्या हस्ते पुरस्कार प्रदान करण्यात आले. कार्यक्रम यशस्वी करण्यासाठी शितल पाटील, माणिक पाटील, तुकाराम पाटील, रवी वासवानी, दीपक गुप्ता, केतन साळगावकर, स्नेहा थोरात आदींनी महत्त्वाची भूमिका बजावली. सर्व पुरस्कार विजेते आपल्या क्षेत्रात उल्लेखनीय कार्य करत असून, त्यांना दिलेला सन्मान प्रेरणादायी ठरला. समाजसेवा, उद्योजकता, शिक्षण, कला-संस्कृती अशा विविध क्षेत्रातील योगदानाचा सन्मान करण्याचा हेतू यामागे असून, पुढील वर्षी अधिक भव्य स्वरूपात हा सोहळा पार पाडण्याचा संकल्प आयोजकांनी व्यक्त केला.
...............................................
बिर्ला महाविद्यालयात ‘अभिजात मराठी भाषादिन’ उत्साहात
डोंबिवली, ता. ७ (बातमीदार) : बी. के. बिर्ला महाविद्यालयाच्या मराठी विभाग आणि तहसील कार्यालय, कल्याण यांच्या संयुक्त विद्यमाने ‘अभिजात मराठी भाषादिन’ मोठ्या उत्साहात साजरा करण्यात आला. या वेळी मराठी भाषेच्या समृद्ध परंपरेचे विविध पैलू अधोरेखित करण्यात आले. या कार्यक्रमात डॉ. दौलतराव कांबळे यांनी मराठी भाषेच्या अभिजाततेबद्दल मार्गदर्शन करत सांगितले की, मराठी ही सांस्कृतिक वैभवाने नटलेली भाषा आहे आणि तिच्या जतनासाठी युवकांनी पुढे यावे. कार्यक्रमात ‘सृजन’ भित्तीपत्रकाचे प्रकाशन प्राचार्य डॉ. अविनाश पाटील यांच्या हस्ते झाले. विद्यार्थ्यांनी श्रुतिका सादर केल्या तसेच निरज रोकडे याने ‘वासुदेव’ बनून एकपात्री अभिनयातून भाषेच्या विस्मरणावर भाष्य केले.
प्रास्ताविक डॉ. सीताराम म्हस्के यांनी, सूत्रसंचालन प्रा. दीपाली देशपांडे यांनी, तर आभार डॉ. मल्हारी मसलखांब यांनी मानले. उपस्थित मान्यवरांमध्ये डॉ. नरेश चंद्र, डॉ. महादेव यादव, तहसीलदार दीपक गायकवाड यांचा समावेश होता. कार्यक्रमाने विद्यार्थ्यांमध्ये मराठीबद्दल अभिमान आणि प्रेरणा जागवली.
.....................................