कल्याणमधील अडीच हजार विद्यार्थ्यांना डिजिटल शिक्षण
कल्याण, ता. ७ (बातमीदार): आजच्या डिजिटल युगात पुस्तकांबरोबरच मोबाईलद्वारेही शिक्षण पोहोचवण्याचा उपक्रम कल्याण पूर्वेतील अडीच हजाराहून अधिक विद्यार्थ्यांसाठी राबवण्यात आला आहे. माजी नगरसेवक महेश गायकवाड यांच्या नेतृत्वाखाली मातोश्री गुंजाई फाऊंडेशनच्या सहकार्याने ‘ई एडझाम ॲप’ च्या माध्यमातून हा उपक्रम साकार झाला. सोमवारी (ता. ६) तिसगाव येथे या ॲपचे सादरीकरण आणि प्रकाशन महेश गायकवाड यांच्या हस्ते करण्यात आले. यावेळी सुप्रसिद्ध समुपदेशक बिपीन पोटे यांनी विद्यार्थ्यांना करिअर घडवताना लक्ष द्यावयाच्या महत्त्वाच्या बाबींबाबत मार्गदर्शन केले.

महेश गायकवाड यांनी सांगितले की, या ॲपमध्ये इयत्ता पहिली ते १० पर्यंतच्या शासनमान्य अभ्यासक्रमाचा समावेश आहे, ज्यामुळे विद्यार्थ्यांना सोप्या पद्धतीने अभ्यास करता येईल. या ॲपच्या माध्यमातून नियमित अभ्यास केल्यास विद्यार्थ्यांचा गुणांक वाढण्यास निश्चित मदत होईल, असे त्यांनी नमूद केले. हा डिजिटल शिक्षणाचा उपक्रम विद्यार्थ्यांसाठी मोठा आधार असून शिक्षणाच्या नव्या मार्गांचा आदानप्रदान करण्यास सक्षम ठरणार आहे.