वेश्याव्यवसायप्रकरणी दलाल महिलेला अटक
ठाणे गुन्हे शाखेची मोठी कारवाई, दोघींची सुटका

ठाणे, ता. ७ : मुलींचे फोटो मोबाईल फोनवर पाठवून वेश्याव्यवसाय चालवणाऱ्या एका दलाल महिलेला ठाणे गुन्हे शाखेच्या अनैतिक मानवी वाहतूक कक्षाच्या पथकाने अटक केली आहे. या कारवाईत पोलिसांनी त्या दलाल महिलेच्या तावडीतून दोन महिलांची सुटका करण्यातही यश मिळवले. ही कारवाई ठाणे स्टेशन परिसरात करण्यात आली.

ठाणे अनैतिक मानवी वाहतूक शाखेच्या वरिष्ठ पोलिस निरीक्षक वैशाली गोरडे यांना सोमवारी (ता. ६) माहिती मिळाली की, ठाणे स्टेशन परिसरात अटकेतील दलाल महिला मुलींचे फोटो मोबाईलवर पाठवून वेश्याव्यवसाय चालवत आहे.
या माहितीच्या आधारे, त्यांच्या पथकाने बनावट ग्राहकाद्वारे सापळा रचला आणि त्या महिलेला तात्काळ ताब्यात घेतले. महिलेविरोधात ठाणे नगर पोलिस ठाण्यात गुन्हा दाखल करण्यात आला असून, तिला अटक करण्यात आली आहे.

पोलिसांनी दलाल महिलेच्या तावडीतून दोन पीडित महिलांची सुटका केली असून, त्यांना सुधारगृहात पाठवण्यात आले आहे. ठाणे पोलिसांनी दिलेल्या माहितीनुसार, अटकेतील दलाल महिला ही गेल्या ४ ते ५ वर्षांपासून अशाप्रकारे मुलींना वेश्यागमनासाठी पाठवत होती.ही कारवाई वरिष्ठ पोलिस निरीक्षक वैशाली गोरडे यांच्या मार्गदर्शनाखाली पोलिस उपनिरीक्षक नीलेश क्षीरसागर, वालघुडे, पोलिस हेडकॉन्स्टेबल विजय पाटील, राजेश सुवारे, किशोर पाटील, विजय नाईक, दिनेश महाले, विजय निकम आणि महिला पोलिस हर्षिता थोरात, पूनम खरात, किरण चांदेकर या पथकाने ठाणे नगर पोलिसांसह संयुक्तपणे पार पाडली.